190 ملین پاؤنڈ ریفرنس  کیس کا فیصلہ سنانے کی تاریخ تبدیل ،فیصلہ کب سنایا جائےگا؟

راولپنڈی: بانی پی ٹی آئی اور ان کی اہلیہ بشریٰ بی بی کے خلاف 190ملین پاؤنڈ ریفرنس کیس کا فیصلہ کل نہیں سنایا جائے گا۔

میڈیا ذرائع کے مطابق احتساب عدالت نے فیصلہ نہ سنانے کے حوالے سے پی ٹی آئی کے وکلا کو آگاہ کر دیا ہے۔

ذرائع کے مطابق 190 ملین پاؤنڈ ریفرنس کی سماعت کل اڈیالہ جیل کے بجائے احتساب عدالت اسلام آباد میں ہو گی اور آئندہ تاریخ احتساب عدالت جی الیون اسلام آباد سے دی جائے گی۔

واضح رہے کہ 190 ملین پاؤنڈ ریفرنس کا ٹرائل ایک سال میں مکمل ہوا اور نیب نے ٹرائل کے دوران 35 گواہان کے بیانات ریکارڈ کرائے۔ بانی پی ٹی آئی کے وکلا نے گواہان پر جرح کی۔

اس کیس میں اہم گواہان  جن سابق پرنسپل سیکرٹری اعظم خان، سابق وزیراعلیٰ پرویزخٹک، سابق وفاقی وزیر زبیدہ جلال نے بھی بیان ریکارڈ کروایا۔ 190 ملین پاؤنڈ ریفرنس میں گزشتہ سال 27 فروری کو فرد جرم عائد کی گئی تھی۔