امریکہ کا فوجی عدالتوں سے شہریوں کو سزاؤں پر اظہار تشویش

امریکا نے 9 مئی کے مقدمات میں فوجی عدالتوں کی جانب سے شہریوں کو سزائیں سنائے جانے پر تشویش کا اظہار کیا ہے۔

امریکی محکمہ خارجہ کے ترجمان میتھیو ملر نے پاکستان کی فوجی عدالتوں کی کارروائی پر تشویش کا اظہار کرتے ہوئے کہا ہے کہ واشنگٹن کو 9 مئی مظاہروں میں ملوث شہریوں کو فوجی ٹریبونلز کی جانب سے دی جانے والی سزاؤں پر تحفظات ہیں۔

انہوں نے کہا کہ یہ  سزائیں منصفانہ ٹرائل کے اصولوں کے خلاف ہیں ۔ پاکستانی حکام آئین میں درج منصفانہ ٹرائل کا احترام کریں۔

واضح رہے کہ اس سے قبل یورپی یونین نے بھی اس فیصلے پر ردعمل دیتے ہوئے سخت تشویش کا اظہار کیا تھا اور کہا تھا کہ پاکستان کی جانب سے شہریوں کے خلاف فوجی عدالتوں میں کیے جانے والے فیصلے بین الاقوامی معاہدوں کی خلاف ورزی ہیں۔

یورپی یونین نے اپنے بیان پاکستان پر زور دیا تھا کہ وہ اپنے شہریوں کے حقوق کی حفاظت کرے اور ان کے خلاف منصفانہ ٹرائل کی ضمانت دے۔