قومی اسمبلی میں مالی سال 2021-22 کا وفاقی بجٹ آج منظور ہوگا

تفصیلات کے مطابق وفاقی حکومت نے بجٹ منظوری سے متعلق تمام تیاریاں مکمل کر لی ، وفاقی وزیر خزانہ قومی اسمبلی میں پیش کئے گئے فنانس بل میں ترامیم پیش کریں گے جبکہ ترامیم کی منظوری کے بعد فنانس بل 2021-22 منظور ہوجائے گا۔فنانس بل منظوری ہونے کے بعد رواں سال کی سپلمنٹری گرانٹس کی منظوری لی جائے گی ۔

 بجٹ سیشن کے دوران اپوزیشن کے تمام کٹوتی کی تحاریک مسترد ہو چکی ہیں جبکہ وزیر اعظم  نے وفاقی کابینہ کا اجلاس ملتوی کرتے ہوئے ارکان اسمبلی اور وزرا کو اجلاس میں شرکت یقینی بنانے کی ہدایت کی ہے ۔

وزیر اعظم عمران خان کی بھی آج قومی اسمبلی اجلاس میں شرکت متوقع ہے جبکہ پروڈکشن آرڈر پر رہا ہونے والے دونوں اراکین  خورشید شاہ، علی وزیر بھی اجلاس میں شریک ہوں گے۔