فیصل آبا د میں نامعلوم مسلح ملزمان نے حوالات میں گھس کر تین بھائیوں کو قتل کر دیا

علی الصبح تھانہ صدر تاندلیانوالہ پر نامعلوم مسلح ملزمان نے حملہ کیا جس کے نتجے میں فائرنگ سے حوالات میں بند تین سگے بھائی جاں بحق ہوگئے جبکہ ان کا کزن زخمی ہوگیا۔

جاں بحق ہونے والے ملزمان میں بلال، عثمان اور ناصر شامل ہیں جبکہ آصف نامی ملزم زخمی ہوگیا ہے، ملزمان تھانہ سٹی تاندلیانوالہ میں درج مقدمہ نمبری 1209/24 بجرم 302 ت پ میں ملزم تھے اور تھانہ صدر کی حوالات میں بند تھے۔

ترجمان پنجاب پولیس کے مطابق ایس پی انوسٹی گیشن فیصل آباد  اور سی آئی اے ٹیموں نے فائرنگ میں ملوث 06 مشتبہ افراد کو حراست میں لیا ہے، قتل دیرینہ دشمنی کا شاخسانہ ہے، مقتولین پر کھرل برادری کے افراد کے قتل کا الزام تھا۔ ملزمان کی دیرینہ دشمنی کی وجہ اورمحفوظ رکھنے کے لیے سٹی کی بجائے تھانہ صدر تاندلیانوالہ میں بند کیا گیا تھا۔

پولیس کے مطابق ملزمان تھانہ کے پیچھے سے سیڑھی لگا کر تھانے میں داخل ہوئے تمام تھانیداروں کے کمروں کو باہر سے کنڈیاں لگائیں اور حوالات میں بند ملزمان پر اندھا دھند فائرنگ کردی جس سے سکھیرا برادری کے تین بھائی جاں بحق ہوگئے۔

پولیس کے مطابق ملزمان وقوعہ کے بعد فرار ہونے میں کامیاب ہوگئے جبکہ اطلاع ملتے ہی سی پی او فیصل آباد سمیت پولیس کی بھاری نفری جائے وقوعہ پر پہنچ گئی۔