ملک کی معاشی ترقی کیلئے سب کے ساتھ مل کر بیٹھنے کو تیار ہوں: وزیراعظم شہباز شریف

کراچی: وزیراعظم شہباز شریف نے کہا ہے کہ معاشی ترقی کیلئے سب کے ساتھ مل بیٹھنے کو تیار ہوں، پاکستان کی معیشت دوبارہ اپنے قدموں پر کھڑی ہو رہی ہے۔
وزیر اعظم شہباز شریف نے دورہ کراچی کے دوران پاکستان اسٹاک ایکسچنیج میں تقریب سے خطاب کرتے ہوئے کہا کہ اسٹاک ایکسچینج میں بہتری پوری ٹیم کی محنت کا صلہ ہے۔ اور یہ ملکی معیشت کی بہتری کے سفر کا آغاز ہے،ان کا کہنا تھا کہ پاکستان اسٹاک ایکسچینج کی بہترین کارکردگی پر سب کو مبارکباد پیش کرتا ہوں،کیونکہ اسٹاک ایکسچینج کی کارکردگی سے ملک میں معاشی استحکام آیا۔ اب ہم نے گروتھ کی طرف بڑھنا ہے۔
اس موقع پر ان کا کہنا تھا کہ ہماری کاوشوں سے ملک میں معاشی استحکام آیا ہے، پاکستان کی معیشت دوبارہ اپنے قدموں پر کھڑی ہو رہی ہے،انہوں نے مزید کہاکہ ہمارا ہدف معاشی نمو ہے، ہمیں معاشی نمو کی طرف بڑھنا ہے، معاشی نمو کیلئے بہترین ٹیم ورک اور سخت محنت کی ضرورت ہے، اس وقت شرح سود 13 فیصد پر ہے، خواہش ہے شرح سود 6 فیصد پر آ جائے، مزید 8 پوائنٹس کمی کی گنجائش موجود ہے۔
وزیر اعظم نے کہا کہ شہر قائد کی ختم ہونے والی روشنیاں دوبارہ بحال ہوچکی ہیںان کا مزید کہنا تھا کہ وہ ملکی معیشت کی ترقی کے لیے سب کے ساتھ مل بیٹھنے کو تیار ہیں، اللہ تعالیٰ نے پاکستان کو بہت سے وسائل اور معدنی ذخائر سے نوازا ہوا ہے۔
وزیراعظم کا کہناتھا کہ اگریہ کہا جائے کہ ہر چیز اچھی ہے تو ہم احمقوں کی جنت میں رہتے ہیں، اگر ہم حقیقت کو تسلیم کرتے ہوئے اعداد و شمار دکھائیں گے، اچھی چیزوں کو سراہیں گے اور برے کو ٹھیک کرنے کا مشورہ دیں گے تو ہم آگے بڑھ سکتے ہیں،انہوں نےمزید کہا کہ آگے بڑھنے کے لیے تمام تجربہ کار لوگوں کے مشورے درکار ہوں گے، ٹیکس کے حوالے سے معاملات روز روشن کی طرح عیاں ہیں، ہمارے ٹیکس سلیب کاروبار کو نہیں چلنے دیں گے اور سرمایہ کاری کو فروغ نہیں کریں گے لیکن ہم آئی ایم ایف پروگرام کے مرحلے میں ہیں، ہمیں ان کی شرائط کو پورا کرنا ہے، وقت آنے پر اس پروگرام سے چھٹکارا حاصل کریں گے۔

پاکستان انٹرنیشنل ایئر لائنز (پی آئی اے) کی نجکاری کے  حوالے سے ان کا کہنا تھا کہ نجکاری کی کوشش متعدد وجوہات کے باعث کامیاب نہیں ہوئی لیکن دعویٰ سے کہتا ہوں کہ مذکورہ عمل 100 فیصد شفاف تھا،انہوں نے مزید کہا کہ نجکاری کا تمام عمل مکمل طور پر شفاف ہوگا اور اس حوالے سے بھی مجھے ماہرین کی تجاویز درکار ہوں گی۔
اس موقع پر ان کامزید کہناتھا کہ گزشتہ 6 ماہ میں ٹیکس محصولات کا ریکارڈ ہمارے سامنے ہے، جی ڈی پی کے حساب سے ٹیکس ہدف حاصل کیا ہے لیکن یہ اختتام نہیں صرف آغاز ہے اور اسے آگے لے جانے کے لیے سرمایہ چاہیے، پالیسی ریٹ 22 پر تھا جو آج 13 فیصد پر آگیا ہے، چاہتا ہوں کہ یہ 6 فیصد پر آجائے۔