وزیراعظم نے بھمبر آزاد کشمیر میں  دانش سکول سسٹم کا سنگ بنیاد رکھ دیا

وزیراعظم محمد شہبازشریف نے ملک کے مختلف علاقوں میں مزید دانش سکول قائم کرنے کا عزم ظاہر کیا ہے۔

 وزیراعظم نے بھمبر آزاد کشمیر میں  دانش سکول سسٹم کا سنگ بنیاد رکھ دیا ، اس موقع پر خطاب کرتے ہوئے انہوں نے کہا کہ ملک میں تعلیمی انقلاب لانے کیلئے دانش سکولوں میں باصلاحیت یتیم اورغریب بچوں کو داخل کیا جاتا ہے۔

انہوں نے بتایا کہ ان سکولوں میں بچوں کو کتابوں ، کھانے اور رہائش کی مفت سہولیات حاصل ہیں ، وزیراعظم نے نیلم اور آزاد کشمیر کے دیگر علاقوں میں مزید دانش سکول قائم کرنے کا اعلا ن بھی کیا۔

شہبازشریف نے کہا کہ مقبوضہ جموں وکشمیر کے جو لوگ آزادی کی جنگ لڑرہے ہیں وہ بھی یہ دیکھ کر خوش ہوں گے کہ ان کے کشمیری بھائی اعلی معیار کی تعلیمی سہولیات حاصل کررہے ہیں۔

انہوں نے کہا کہ گلگت بلتستان ، بلوچستان اور خیبرپختونخوا کے ضم شدہ اضلاع میں بھی دانش سکول کھولے جائیں گے۔