سی ٹی ڈی کی پنجاب میں کارروائیاں،  مختلف شہروں سے 10خطرناک دہشتگرد گرفتار

لاہور:محکمہ انسداد دہشت گردی ( سی ٹی ڈی) نے پنجاب کے مختلف شہروں میں کارروائیاں کرتے ہوئے دوران 10 خطرناک دہشت گردوں کو گرفتارکرلیا۔
 سی ٹی ڈی ترجمان کے مطابق دہشت گردی کے خدشات کے پیش نظر پنجاب کے مختلف شہروں میں 163  انٹیلجنس بیسڈ آپریشنز(آئی بی اوز) کیے گئے۔ انٹیلیجنس بیسڈ آپریشن میں 10 دہشتگردوں کو گرفتار کیا گیا۔
ترجمان کے مطابق یہ کارروائیاں لاہور، راولپنڈی ، شیخوپورہ ، میانوالی، سرگودھا اور فیصل آباد کے اضلاع میں کی گئیں۔
ترجمان سی ٹی ٖڈی نے کہا کہ راولپنڈی سے خارجی گروہ کے 3 جبکہ لاہور سے ایک خطرناک دہشت گرد کو گرفتار کیا گیا۔
ترجمان کے مطابق گرفتار کیے گئے دہشت گردوں  کے قبضے سے دھماکا خیز مواد، ایک آئی بی ڈی بم، 11 حفاظتی فیوز، 22 فٹ تار، پمفلٹ  اور نقدی برآمد ہوئی۔
گرفتار کیے گئے دہشتگردوں کی شناخت حافظ محمد رفیق، اکبر، زین اللہ، اویس احمد، احسان، سجاد، لقمان اور ندیم کے نام سے ہوئی۔
سی ٹی ڈی حکام نے مزید کہا کہ دہشت گرد مختلف مقامات پر کارروائی کر کے عوام میں خوف و ہراس پھیلانا چاہتے تھے۔ رواں ہفتے میں  2893 کومبنگ آپریشنز کے دوران736 مشتبہ افراد گرفتار کیے،کومبنگ آپریشنز میں111849 افراد سے پوچھ گچھ کی گئی۔
 ترجمان کی جانب سے مزید بتایا گیا کہ سی ٹی ڈی محفوظ پنجاب کے ہدف پر عمل پیرا ہے،اور صوبے سے دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔