رمضان شوگر مل کیس: سابق وزیر اعلی حمزہ شہباز کی بریت پر فیصلہ محفوظ،فیصؒلہ کب سنایا جائے گا؟

لاہور:اینٹی کرپشن عدالت لاہورنے سابق وزیر اعلی پنجاب حمزہ شہبازاور شہباز شریف کے خلاف رمضان شوگر ملز ریفرنس کا فیصلہ محفوظ کر لیا۔
مضان شوگر ملز ریفرنس کی سماعت اینٹی کرپشن عدالت کے جج سردار محمد اقبال ڈوگر نےکی۔ دوران سماعت اینٹی کرپشن عدالت نے وکلا کے دلائل مکمل ہونے پر رمضان شوگر ملز ریفرنس کا فیصلہ محفوظ کر لیا ہے، یہ فیصلہ عدالت 6 فروری کو سنائے گی۔
دوران سماعت حمزہ شہباز اور شہباز شریف کے وکیل امجد پرویز نے دلائل دیتے ہوئے کہا کہ نالے کی تعمیر کی ہدایت اُس وقت کے وزیر اعلیٰ پنجاب شہباز شریف نے نہیں کی تھی، نالے کی تعمیر کی منظوری پنجاب کابینہ نے دی، اور اسے علاقے کی بہتری کے لیے بنایا گیا تھا،امجد پرویز نے کہا کہ شہباز شریف اور حمزہ شہباز کے خلاف مقدمہ سیاسی بنیادوں پر قائم کیا گیا۔
اینٹی کرپشن کے پراسیکیوٹر میاں وسیم نے عدالت کو دلائل دیتے ہوئے بتایاکہ میری نظر میں گندے نالے کا رخ درست ہے، مقدمے کا مدعی بھی منحرف ہو گیا ہے، مدعی نے کہا کہ اس نے درخواست ہی جمع نہیں کروائی، اس وقت کے ایم پی اے رحمت علی مرحوم کی درخواست پر نالہ تعمیر ہوا تھا۔
 محمد وسیم نےمزید کہا کہ ہمارے پاس کوئی ایسا گواہ نہیں ہے جسے پیش کرنا ہے۔ تمام گواہان کے بیانات ریکارڈ ہو چکے ہیں۔ تمام شواہد فائل کے ساتھ لگائے ہوئے ہیں۔ اس کیس میں سات گواہان کے بیانات ریکارڈ کیے گئے ہیں۔
جس پر عدالت کے جج نے سرکاری وکیل سے مکالمہ کرتے ہوئے کہا کہ آپ کیا کہتے ہیں کہ کیا دوسرے گواہوں کے بیانات ہونے چاہییں یا نہیں؟
 سرکاری وکیل نے کہا کہ اس میں جو متعلقہ ایم پی اے تھے وہ فوت ہوگئے۔ اس میں تمام گواہ سرکاری ہیں۔ اس کیس میں بہت سے گواہ غیر متعلقہ ہیں۔ میرے حساب سے تو نالے کا روٹ تو صحیح بنا ہوا ہے۔
 عدالت میں سرکاری وکیل کی جانب سے دلائل مکمل کرلیے گئے۔ عدالت نے کیس کی سماعت 6 فروری تک ملتوی کردی۔