پنجاب ریونیو اتھارٹی کی رواں مالی سال میں جولائی سے جنوری تک 142 بلین روپے سے زائد کی ٹیکس وصولی

لاہور: پنجاب ریونیو اتھارٹی (پی آر اے)نے رواں مالی سال میں جولائی سے جنوری تک ٹیکس محصولات کی مد میں  142 بلین روپے   کا ٹیکس جمع کیا ،جبکہ ماہ جنوری میں پنجاب سیلز ٹیکس کی مد میں 22.21 بلین روپے کا ریکارڈ ٹیکس اکھٹا کیا۔ 
ترجمان پی آر اے کے مطابق یہ وصولی گزشتہ سال کے مقابلے میں 12 فیصد زیادہ ہے ، جبکہ پنجاب سیلز ٹیکس کی مد میں 10 فیصد گروتھ دیکھی گئی ۔
ترجمان کے مطابق پنجاب انفراسٹکچر ڈویلپمنٹ سیس کے تحت  30 فیصد گروتھ جب کہ پنجاب ورکرز ویلفیئر فنڈز کی مد میں جولائی سے جنوری تک 46 فیصد گروتھ دیکھی گئی،ان کا کہنا تھا کہ قابل غور بات ہے کہ رواں مالی سال میں کوئی نیا ٹیکس نہیں لگایا گیا نہ ہی ٹیکس ریٹ میں اضافہ کیا گیا ہے ۔

ترجمان کا کہنا ہے کہ اسٹیک ہولڈرز اور ٹیکس پیرز کو ورکشاپس کے ذریعے  آگاہی دینے، ٹیکس کے دائرہ  کارکو وسیع کر کے پی آر اے گزشتہ سالوں سے ٹیکس ہدف پورا کرتی آرہی ہے ،ہم پر امید ہیں کہ اس سال بھی ٹیکس ہدف عبور کر لیں گے ۔
 پی آر اے کی جانب سے رواں مالی سال میں ریٹرن فائلنگ کا جدید سسٹم پی آر اے  آئرس متعارف کروایا گیا  جو شفافیت پر مبنی، پیپر لیس آفس کی جانب اہم قدم ہے ۔
ترجمان نے مزید کہا کہ پی آر اے  کے  الیکٹرانک انوائس مانیٹرنگ سسٹم  اور ایف بی آر کے  پوائنٹ آف سیل سسٹم کے مربوط  ہونے سے ٹیکس ڈیٹا کا حصول آسان ہوسکے گا ، انہوںنے کہا کہ رواں مالی سال میں سنگل سیلز ٹیکس ریٹرن بھی متعارف کرائی گئی جس کو
 آئل اینڈ گیس اور مائیکروفنانس بنکوں , انشورنس و بینکنگ  تک وسیع کرنے پر اتفاق کیا گیا۔
اس کے علاوہ پی آر اے جلدٹیکس گزار ان کی سہولت کے لئے دیگر بین الصوبائی بزنس سیکٹرز پر سنگل  سیلز ٹیکس ریٹرن  کی سہولت  متعارف  کرائے گا۔
دوسری جانب پنجاب ریونیو اتھارٹی نے پنجاب حکومت کی معاونت سے غیر رجسٹرڈ ٹیکس نادہندگان کے گرد گھیرہ تنگ کرنے کیلئے حکمت عملی بھی تیار کر لی ۔
پی آر اے تحصیل اور ضلعی سطح پر غیر رجسٹرڈ افراد کا ڈیٹا اکٹھا کرنے کیلئے پنجاب حکومت کے افسران کی مدد لے گا ،ضلعی لیول پر ایڈیشنل ڈپٹی کمشنر جنرل اور تحصیل سطح پر متعلقہ اسسٹنٹ کمشنر ڈیٹا اکٹھا کریں گئے۔
ترجمان کے مطابق اختیارات دینے کا مقصد غیر رجسٹرڈ افراد کی شناخت کرنے کے علاوہ ٹیکس نیٹ کا دائرہ کار وسیع کرنا ہے ۔