گوگل نےباضابطہ طور پرنیا اے آئی چیٹ بوٹ جیمنائی 2.0  پر صارفین کے لیے متعارف کر وا دیا

لاہور:گوگل نے باضابطہ طور پراپنے صارفین کے لیے نیا اے آئی چیٹ بوٹ جیمنائی 2.0  متعارف کروا دیا ہے۔
خیال رہے کہ اس سے قبل دسمبر 2024 میںگوگل نے جیمنائی کے اس نئے ماڈل کو متعارف کرانے کا اعلان کیا تھا، اس وقت گوگل کے چیف ایگزیکٹو سندر پچائی نے جیمنائی کے نئے ماڈل 2.0 فلیش کو Agentic ٹیکنالوجی کا نیا عہد قرار دیا تھا۔
سندر پچائی کی جانب سے اس وقت جاری کیے گئے بیان میں کہا گیا تھا کہ اگر جیمنائی 1.0 تفصیلات کو سمجھنے اور منظم کرنے کے لیے تھا تو جیمنائی 2.0 اس عمل کو بہت زیادہ کارآمد بنا دے گا۔
 Agentic اے آئی سے مراد ایسا سسٹم ہے جو خودمختار طور پر فیصلے کرنے، صارفین کے لیے کام کرنے اور اقدامات کرنے کی صلاحیت رکھتا ہے،کمپنی کے مطابق جیمنائی 2.0 نے سابقہ ماڈل کو مختلف شعبوں جیسے کوڈ جنریشن میں پیچھے چھوڑ دیا ہے۔
تاہم اب اس نئے اے آئی چیٹ بوٹ کو تمام صارفین کے لیے باضابطہ طور پر متعارف کرا دیا گیا ہے۔
اس حوالے سے کمپنی کی جانب سے جاری کیے گئے ایک بیان میں کہا گیا ہے کہ جیمنائی 2.0 فلیش کے تجرباتی ورژن کو گوگل اے آئی اسٹوڈیو، ورٹیکس اے آئی اور جیمنائی ایپ کے لیے جاری کیا گیا ہے جس تک رسائی جیمنائی کے ایڈوانسڈ صارفین کو حاصل ہوگی۔
بیان میں مزید کہا گیا ہے کہ یہ ہمارا کوڈنگ پرفارمنس اور پیچیدہ پروموٹس کے حوالے سے اب تک کا بہترین ماڈل ہے،اب ڈویلپرز اپنی ایپس کو 2.0 فلیش کی مدد سے تیار کرسکیں گے، جس سے صارفین کو گوگل جیمنائی کے زیادہ مؤثر چھوٹے ورژن کو استعمال کرنے کا موقع ملے گا۔
خیال رہے کہ گوگل نے یہ نیا اے آئی بوٹ اس وقت جاری کیا ہے جب چینی کمپنی ڈیپ سیک کا اے آئی چیٹ بوٹ آر 1 دنیا بھر کی توجہ کا مرکز بنا ہوا ہے،گوگل کے مطابق جیمنائی ایپ کو استعمال کرنے والے صارفین بھی جیمنائی 2.0 فلیش کو تجرباتی طور پر آزما سکتے ہیں۔