کسی سیاسی جماعت یا لیڈر نے ملک کی اساس یا دفاع کے نشانات کو نشانہ نہیں بنایا ، خواجہ آ صف

وزیر دفاع خواجہ آصف نے ایکس پر اپنے ایک پیغام میں 9 مئی کے واقعات کی شدید مذمت کی اور اس بات پر زور دیا کہ ماضی میں کسی سیاسی جماعت یا لیڈر نے ملک کی اساس یا دفاع کے نشانات کو نشانہ نہیں بنایا۔

خواجہ آصف نے پیغام میں مزید کہا کہ ماضی میں پیپلز پارٹی، مسلم لیگ، یا دیگر سیاسی جماعتوں کی قیادت کو جب بھی اقتدار سے علیحدہ کیا گیا یا قید کیا گیا، ملک کی سالمیت اور دفاعی اداروں پر کوئی حملہ نہیں کیا گیا۔

انہوں نے مثال دیتے ہوئے کہا کہ ذوالفقار علی بھٹو شہید کو پھانسی دی گئی، نصرت بھٹو اور بے نظیر بھٹو کو قید اور جلاوطن کیا گیا، نواز شریف اور شہباز شریف کو قید کیا گیا اور آصف زرداری بھی طویل عرصے تک قید رہے، لیکن اس دوران کبھی بھی دفاعی اداروں اور شہداء کی یادگاروں کو نشانہ نہیں بنایا گیا۔

انہوں نے کہا کہ پاکستان کی 77 سالہ تاریخ میں کبھی بھی کسی لیڈر یا جماعت نے شہداء کی توہین نہیں کی، کیونکہ یہ قومی شناخت اور مشترک اثاثے ہیں۔

وزیر دفاع نے کہا کہ 2018 کے بعد بھی نواز شریف، شہباز شریف، مریم نواز اور حمزہ شہباز کو قید کیا گیا، اور آصف زرداری اور ان کی ہمشیرہ فریال تالپور بھی قید ہوئیں۔ تاہم، انہوں نے کہا کہ اس دوران سیاسی جماعتوں نے ہمیشہ ملکی دفاع کے اداروں کے وقار کا خیال رکھا اور کبھی بھی غیر متناسب اقدامات نہیں کیے۔