نئی دہلی میں رنگا رنگ پاکستان فیسٹ کا انعقاد،شرکا کی بھر پور شرکت

ئئی دہلی:پاکستانی ہائی کمیشن نیو دہلی کے زیر انتظام پاکستان فیسٹ کا انعقاد کیا گیا، جہاں پاکستانی تہذیب و تمدن، ثقافت اور پکوانوں سمیت فنون لطیفہ کی عکاسی کی گئی۔
تفصیلات کے مطابق ’’پاکستان فیسٹ ’‘ میں پاکستانی روایتی لباس اور پاکستانی کھانوں کی نمائش کی گئی ، فیسٹ میں متعدد اسٹالز لگائے گئے، جن میں فیس پینٹ، روایتی پاکستانی ملبوسات اور پاکستانی پکوان کے اسٹالز بھی شامل ہیں، فیسٹ میں پاکستانی روایات، تہذیب، فنون لطیفہ اور تاریخ کے تناظر میں ایک تصویری نمائش بھی پیش کی گئی۔
میلے میں زندگی کے مختلف شعبوں سے تعلق رکھنے والے افراد نے شرکت کی اور شرکا کو اپنی طرف متوجہ کیا، میلے کے شرکا پاکستانی پکوانوں سے لطف اندوز ہوئے اور نمائش میں پاکستان کے ثقافتی ورثے کی بھرپور عکاسی کرنے والی مختلف اشیاء میں گہری دلچسپی کا اظہار کیا۔
اس موقع پر ایک تقریب سے خطاب کرتے ہوئےپاکستان کے ناظم الامور سعد احمد وڑائچ نے اپنے خطاب میں کہا کہ میلے کے رنگ اور اس کے لذیذ ذائقے پاکستان کی قابل فخر ثقافتی اور پاک روایات کا منہ بولتا ثبوت ہیں۔
انہوں نےمزید کہا کہ ثقافتی افہام و تفہیم کو فروغ دینے اور ہمدردی اور دوستی کی فضا کو فروغ دینے کے لیے اس طرح کی تقریبات ضروری ہیں۔