صدر مملکت کی پرنس رحیم الحسینی سے ملاقات،آغا خان چہارم کے انتقال پرگہرے دکھ اور تعزیت کا اظہار

لزبن:صدر مملکت آصف علی زرداری نے اسماعیلی کمیونٹی کے روحانی پیشواور50ویں امام ا پرنس رحیم الحسینی سے ملاقات کی اور ان کےوالد کریم آغا خان چہارم کے انتقال پر تعزیت کی ہے۔
 صدر مملکت آصف زرداری نے پاکستانی عوام اور حکومت کی جانب سے دلی ہمدردی کا اظہارکرتے ہوئے کہا کہ پوری قوم سچے دوست اور عظیم انسان دوست شخصیت سے محروم ہونے پر سوگوار ہے۔
دوران ملاقات صدر مملکت نے مرحوم آغا خان چہارم کے پاکستان کی سماجی اور معاشی ترقی میں کردار کو سراہتے ہوئے کہا کہ مرحوم آغا خان کی دور اندیش قیادت نے پاکستان اور دنیا کے دیگر خطوں میں لوگوں کی زندگیوں کو بہتر کیا۔
صدر زرداری نے کہا کہ انہیں چین کے سرکاری دورے کے دوران آغا خان کے انتقال کی خبر ملی، مرحوم آغا خان کی انسان دوستی اور انسانیت کے لیے زندگی بھر کی خدمات کو خراج تحسین پیش کرنے لزبن آیا ہوں۔
انہوں نے مزید کہا کہ مرحوم آغا خان نے اپنی زندگی خدمت خلق اور لوگوں کی فلاح و بہبود کے لیے وقف کی،  انسانیت کے لیے مرحوم آغا خان کی خدمات کو ہمیشہ یاد رکھا جائے گا۔انہوں کہا کہ امید ہے کہ پرنس رحیم الحسینی انسانیت کی خدمت کے اپنے والد کے مشن کو جاری رکھیں گے۔
صدر پاکستان کا دورہ پاکستان اور آغا خان خاندان کے درمیان گہری اور پائیدار دوستی اور پرنس کریم آغا خان کی میراث کے دیرپا اثرات کو اجاگر کرتا ہے۔