یورپ کی ضعیف العمرخاتون 117ویں سالگرہ سےقبل کورونا سے صحتیاب

سسٹر آندرے کے نام سے مشہور فرانسیسی راہبہ  میں 16 جنوری کو کورونا وائرس کی تشخیص ہوئی تھی لیکن ان  میں کوئی کورونا کی واضح علامت ظاہر  نہیں ہوئیں تھیں ۔کورونا کی تشخیص کے بعد  سسٹر آندرے نے جنوبی فرانس کے شہر ٹولن میں خود کوقرنطینہ کر لیا  تھا تاہم اب وہ مکمل صحت یاب ہوچکی ہیں ۔

انہوں نے اس کی علامت نہ ہونے کا ذکر کرتے ہوئے کہا ، "مجھے احساس تک نہیں تھا کہ مجھے کورونا ہوگیا ہے۔"

سسٹر آندرے  نابینا ہیں اور چلنے پھرنے  کے لئے وہیل چیئر استعمال کرتی ہیں ۔  وہ اپنی سالگرہ دوستوں کے ساتھ منانے کے لئے  بھرپور تیار  نظر آتی ہیں ۔سسٹر آندرے جہاں رہائش پذیر ہیں اس ریٹائرمنٹ ہوم کے ترجمان ڈیوڈ ٹیویلا  کاکہنا ہے کہ  " یہ بہت خوش قسمت رہی ہیں ،  انہوں  نے مجھ سے اپنی صحت کے بارے میں نہیں ، بلکہ اپنی عادات کے بارے میں پوچھا۔ مثال کے طور پر  وہ جاننا چاہتی تھی کہ آیا کھانے یا سونے کے وقت کا نظام الاوقات تبدیل ہوجائے گا،انہوں نے  کورونا  کا کوئی خوف ظاہر نہیں کیا۔  البتہ   وہ دوسرے لوگوں  کے بارے میں بہت فکر مند تھیں ۔

جیرونٹولوجی ریسرچ گروپ کی (جی آر جی) ورلڈ سپرسنٹنینیرین رینکنگ لسٹ کے مطابق 11 فروری 1904 کو پیدا ہونے والی سسٹر آندرے دنیا کی دوسری سب سے عمر رسیدہ شخصیت  ہونے کے علاوہ یورپ کی سب سے ضعیف  العمر خاتون بھی ہیں ۔