ہم اس ملک کیلئے جانیں دے رہے ہیں، آرمی چیف

 ملکی سلامتی سے متعلق معاملات پر سول اور عسکری قیادت کا موقف ایک، وزیر اعظم عمران خان کے بعد آرمی چیف نے بھی امریکہ کو اڈے دینے سے متعلق واضح موقف دی دیا۔

آرمی چیف نے کہا کہ  کسی کو اڈے نہیں دیں گے ، کوئی ہمارے سر زمین کسی کے خلاف استعمال نہیں کرے گا۔ آرمی چیف نے کہا حکومتی پالیسی پر مکمل عملدرآمد کریں گے۔

آرمی چیف نے 7 گھنٹے سے زائد جاری رہنے والے اجلاس میں تمام سوالوں کے جوابات دئیے۔آرمی چیف کے جوابات پر اپوزیشن اور حکومتی ارکان نے  ڈیسک بجا کر تعریف کی۔

بلاول بھٹو نے اجلاس میں وزیراعظم کی عدم شرکت کامعاملہ اٹھا دیا ۔بلاول بھٹو نے کہا کہ وزیراعظم کو آج کے اجلاس میں ہونا چاہئیے تھا، جس پر حکومتی ارکان نے جواب دیا کہ وزیراعظم آنا چاہتے تھے مگر اپوزیشن ایسا نہیں چاہتی تھی۔

لیگی ارکان اجلاس کے دوران آرمی چیف کے ارد گرد کھڑ ے رہے،شہباز شریف بھی آرمی چیف کے پاس جا کر کھڑے ہوئے ۔شہباز شریف نے تقریر میں فوج کی قربانیوں کا اعتراف کیا۔شہبا ز شریف نے کہا کہ  ہم جب آئے تو دہشت گردی عروج پر تھی، فوج نے قربیانیاں دیں۔

سینیٹر مشتاق نے کہا کہ 2001 تک حالات ٹھیک تھے بعد میں خراب ہوئے، جس پر آرمی چیف نے جواب دیا کہ  حالات 2001 سے نہیں 79 سے خراب ہونا شروع ہوئے۔

رکن اسمبلی محسن داوڑ نے چیک پوسٹوں سے متعلق اٹھایا۔محسن داوڑ نے کہا کہ  جہاں جاتے ہیں چیک پوسٹوں پر روکا جاتا ہے، اس پر آرمی چیف کا کہنا تھا کہ  ہم نے آپ کو بلا کر مسائل حل کرانے کی یقین دہانی کروائی،"لیکن آپ کہتے ہیں یہ جو دہشتگردی ہے اس کے پیچھے وردی ہے "  ہم اس ملک کیلئے جانیں دے رہے ہیں،آپ کے علاقوں کی ترقی کو ترجیح سمجھ کر ترقیاتی کام کروائے، وہاں ہمارے لوگوں کے سروں کو فٹ بال بنا کر کھیلا گیا۔

 آرمی چیف جنرل قمر جاوید باجوہ نے مزید کہا کہ  حال ہی میں ہمارے 5 جوان شہید ہوئے ہیں ،ہم بھی انسان ہیں، لوگوں کا دکھ درد محسوس کرتے ہیں، ہم نے ہزاروں مسنگ پرسنز کو ریکور کیا، آپ کا کیا خیال ہے کہ ہم مسلمان ہو کے بے گناہوں کو پکڑیں گے،ہم کبھی نہیں چاہیں گے کہ آخرت میں ہمارے گلے میں پھندا ہو۔