پنجاب میں کورونا ویکسینیشن کے جعلی اندراج کا انکشاف

سیکریٹری صحت پنجاب سارہ اسلم نے ویکسینیشنز کے جعلی اندراج کا نوٹس لے لیا ہے۔صوبائی حکومت نے ویکسینیشنز کے جعلی اندراج کی روک تھام کے لیے ویکسین کے اسٹاک کی سخت مانیٹرنگ کا فیصلہ کیا ہے۔

سیکریٹری صحت پنجاب نے کہا کہ فیک اینٹریز اور اسٹاک مانیٹرنگ کے لیے فیکٹ فائنڈنگ کمیٹی قائم کی ہے۔

سارہ اسلم کے مطابق چار رکنی کمیٹی کا کنوینر ایڈیشنل سیکریٹری ٹیکنیکل ڈاکٹر عاصم الطاف کو مقرر کیا گیا ہے۔

سیکریٹری صحت پنجاب کے مطابق ڈپٹی ڈائریکٹر احمر خان فیکٹ فائنڈنگ کمیٹی کے سیکرٹری مقرر ہیں۔

سارہ اسلم کے مطابق ڈپٹی سیکرٹری ورٹیکل پرائمری اینڈ سیکنڈری ہیلتھ کیئر سیدہ رملہ اور ڈپٹی سیکرٹری ٹیکنیکل 2 طارق خواجہ بھی کمیٹی کے ممبر نامزد کیے گئے ہیں۔

سیکریٹری صحت پنجاب کے مطابق کمیٹی ویکسینیشن کے عمل کو مزید بہتر بنانے کے لیے سفارشات بھی مرتب کرے گی۔