آسٹریا میں شامی پناہ گزین کا راہ چلتے لوگوں پر چاقو سے حملہ، 1 ہلاک 4 زخمی

ولاچ:آسٹریا میں چاقو بردار شخص کے حملے میں ایک لڑکا جاں بحق اور دیگر 4 زخمی ہوگئے۔
غیر ملکی میڈیا کے مطابق چاقو حملے کا واقعہ آسٹریا کے شہر ولاچ میں پیش آیا جہاں ایک شخص نے راہ چلتے لوگوں پر حملہ کیا جس کے نتیجے میں 14 سالہ لڑکا ہلاک جبکہ 4 افراد زخمی ہو گئے۔
 مقامی پولیس کے مطابق حملہ آور چاقو بردار شخص 23 سالہ شامی پناہ گزین تھا جسے گرفتار کرلیا گیا،حملے میں ایک 14 سالہ لڑکا ہلاک اور 4 دیگر زخمی ہوگئے جن میں سے 2 کی حالت نازک بتائی جا رہی ہے۔ 
پولیس حکام کا کہنا ہے کہ ابھی تک حملے کے محرکات کا علم نہیں ہوسکا اور نہ ہی قاتل اور مقتول کے درمیان کوئی تعلق سامنے آیا ہے، جبکہ ملزم سے تفتیش جاری ہے۔ تفتیش مکمل ہونے کے بعد میڈیا کو تفصیلات سے آگاہ کیا جائے گا۔
پولیس کی جانب سےتاحال گرفتار حملہ آور کی شناخت ظاہر نہیں کی گئی ہے جب کہ ہلاک ہونے والے لڑکے کی معلومات اہل خانہ سے اجازت ملنے کے بعد جاری کی جائیں گی۔