پارلیمنٹ کا مشترکہ اجلاس 7 مارچ کو بلانے کی تیاریاں شروع

پارلیمنٹ کا مشترکہ اجلاس 7 مارچ کو بلانے کی تیاریاں شروع کردی گئی ہیں جس سے صدر مملکت آصف علی زرداری خطاب کریں گے۔

ذرائع کے مطابق وزارت پارلیمانی امور نے پارلیمنٹ کا مشترکہ اجلاس 7 مارچ کو بلانے کی تیاریاں شروع کردی ہیں، پارلیمنٹ کے مشترکہ اجلاس سے صدارتی خطاب کے بعد قومی اسمبلی کے نئے پارلیمانی سال کا آغاز ہوگا۔

ذرائع نے بتایا کہ 16 ویں قومی اسمبلی کی تشکیل کے بعد صدر آصف علی زرداری کا پارلیمنٹ سے دوسرا خطاب ہوگا جب کہ صدر زرداری کا قومی اسمبلی اور سینیٹ کے مشترکہ اجلاس سے یہ ریکارڈ آٹھواں خطاب ہوگا۔

2008 سے 2013 تک ایوان صدر میں اپنے پانچ سالہ دور کے دوران وہ پہلے ہی چھ بار پارلیمنٹ سے خطاب کرچکے ہیں۔

ذرائع کا کہنا تھا کہ موجودہ قومی اسمبلی کا پہلا پارلیمانی سال مکمل ہوگیا ہے اور نیا پارلیمانی سال صدر مملکت کے خطاب سے شروع ہوتا ہے۔

ذرائع نے کہا کہ وزارت پارلیمانی امور نے حکومت کی ایک سالہ کامیابیوں اور پالیسیوں کے حوالے سے مواد حاصل کرلیا ہے، صدر کے خطاب میں حکومت کی ایک سالہ کامیابیوں کو اجاگر کیا جائے گا۔

ذرائع نے مزید بتایا کہ صدر آصف علی زرداری اپنے خطاب میں حکومت کی معاشی پالیسیوں، سیاسی صورتحال اور درپیش قومی مسائل پر اظہار خیال کریں گے۔