یوکرین جنگ چند ہفتوں میں ختم ہوسکتی ہے، ٹرمپ کی فرانسیسی صدرسے گفتگو

امریکی صدر ڈونلڈ ٹرمپ سے فرانسیسی صدر میکرون کی واشنگٹن میں ملاقات ہوئی ہے۔

غیر ملکی رپورٹ کے مطابق دونوں رہنماؤں نے مشترکہ پریس کانفرنس کی، جس میں امریکی صدر ٹرمپ نے کہا کہ یوکرین جنگ چند ہفتوں میں ختم ہوسکتی ہے۔یوکرینی صدر سے رواں ہفتے یا آئندہ ہفتے ملاقات متوقع ہے۔ روسی صدر پیوٹن سے متعلق امریکی صدر نے کہا کہ پیوٹن یورپی امن دستوں کو قبول کریں گے۔

پریس کانفرنس میں ڈونلڈ ٹرمپ کا کہنا تھا کہ یوکرین میں امن کیلئے یورپی افواج بھیجنے میں مسئلہ نہیں۔ روس یوکرین جنگ روکنے پر بہت زیادہ پیشرفت ہوئی ہے۔ یہ جنگ کبھی نہ ہوتی اگر اس وقت وہ صدر ہوتے اور کہا کہ وہ اس جنگ کو انسانیت کی بنیاد پر حل کرنے کی کوشش کر رہے ہیں۔

ٹرمپ نے کہا کہ کسی موقع پر روسی صدرسے بھی ملاقات کروں گا، مناسب وقت پرماسکوجانے کیلئے تیار ہوں۔یوکرین کو اپنا علاقہ چھوڑنا چاہیے یا نہیں اسی سے متعلق دیکھیں گے۔

فرانسیسی صدر میکرون نے کہا کہ امن مشن میں یورپی فوجیوں کو شامل کرسکتے ہیں۔ یوکرین کو سلامتی کی ضمانت دینے کیلئے تیار ہیں۔ ہمارا مقصد یوکرین میں دیرپا امن قائم کرنا ہے۔ یورپی افواج کی یوکرین میں موجودگی ضمانتی ہوں گی۔

فرانسیسی صدر میکرون نے کہا کہ یورپ اس بات کے لیے تیار ہے کہ وہ ایک قابل اعتماد پارٹنر بنے اور اس بات کو یقینی بنائے کہ یوکرین میں امن قائم ہو۔ دونوں ممالک ایک معاہدہ کرنے کے بہت قریب ہیں جس سے جنگ کا خاتمہ ممکن ہو سکے گا۔