یو اے ای میں ویزا درخواستوں کو تیز اور آسان بنانے کیلئے اے آئی سسٹم ’سلامہ‘ متعارف

متحدہ عرب امارات نے ویزا تجدید اور دیگر اقامتی خدمات کو مزید تیز اور آسان بنانے کے لیے آرٹیفیشل انٹیلیجنس (AI) سسٹم ’سلامہ‘ متعارف کروا دیا۔

جنرل ڈائریکٹوریٹ آف ریذیڈنسی اینڈ فارنرز افیئرز (GDRFA) دبئی نے اعلان کیا کہ یہ جدید پلیٹ فارم صارفین کو چند سیکنڈز میں ویزا کی تجدید، ادائیگی، اور دیگر اقامتی امور مکمل کرنے کی سہولت فراہم کرے گا۔

لیفٹیننٹ جنرل محمد احمد المری نے کہا کہ ڈیجیٹل ٹرانسفارمیشن کا مقصد صرف خدمات فراہم کرنا نہیں بلکہ حکومتی کارکردگی کو بہتر بنانا اور صارفین کو آسانی فراہم کرنا ہے۔

کولونیل خالد بن مدیا الفلاسی کے مطابق ’سلامہ‘ جدید الگورتھمز کے ذریعے ویزا درخواستوں کو چند سیکنڈز میں پراسیس کرتا ہے۔ یہ سسٹم 40 سے زائد زبانوں کو سپورٹ کرتا ہے اور مستقبل میں مزید زبانیں شامل کی جائیں گی۔

یو اے ای پاس کے ذریعے لاگ ان کرنے کے بعد، سسٹم خودکار طریقے سے صارف کی تفصیلات شناخت کرتا ہے، دستاویزات دکھاتا ہے، اور فوری تجدید کی سہولت فراہم کرتا ہے۔

یہ سسٹم مستقبل میں کمپنیوں کے لیے بھی خدمات فراہم کرے گا، جس سے دبئی کی ڈیجیٹل ٹرانسفارمیشن اسٹریٹجی کو مزید فروغ ملے گا۔