معاشی بحران: ایرانی وزیر خزانہ مواخذے کے بعد برطرف

تہران:اسلامی جمہوریہ ایران میں مہنگائی اور ایرانی ریال کی قدر میں کمی پرپارلیمنٹ نے وزیر خزانہ کے خلاف مواخذے کی کارروائی کرتے ہوئے انہیں عہدے سے ہٹانے کے حق میں ووٹ دے دیا۔
 ایرانی میڈیا کے مطابق 273 میں سے 182 ارکان نے وزیر خزانہ عبدالناصر ہمتی کے خلاف ووٹ دیا۔ ایرانی وزیر خزانہ اور وزیر اقتصادیات عبدالناصر ہمتی ایرانی  صدر مسعود پزشکیان کی 8 ماہ پہلے بننے والی کابینہ میں شامل ہوئے تھے۔
 غیر ملکی خبررساں ایجنسی کے مطابق گزشتہ روز بلیک مارکیٹ میں ایک امریکی ڈالر کی قیمت 9 لاکھ 20 ہزار ایرانی ریال ہے جبکہ 2024 کے وسط میں یہ 6 لاکھ ایرانی ریال سے کم تھی۔
 قبل ازیں اس سے قبل ایرانی صدر مسعود پزشکیان نے عبد الناصر ہمتی کا دفاع کرتے ہوئے قانون سازوں سے کہا تھا کہ ’ہم دشمن کے ساتھ مکمل اقتصادی جنگ میں ہیں، ہمیں جنگی حکمت عملی اپنانا ہوگی۔ 
خیال رہے کہ امریکا کی زیر قیادت کئی دہائیوں سے جاری پابندیوں نے ایران کی معیشت کو بری طرح متاثر کیا ہے اور دو ہندسوں میں افراط زر کی وجہ سے کنزیومر پرائس میں اضافہ ہوا ہے۔