امریکی صدر ڈونلڈ ٹرمپ نے یوکرین کے لیے تمام فوجی امداد روک دی

امریکی صدر ڈونلڈ ٹرمپ نے یوکرین کے لیے تمام فوجی امداد روک دی۔

امریکی میڈیا کے مطابق ٹرمپ نے یوکرین کے لیے تمام فوجی امداد روک دی ہے اور ان کا کہنا ہے کہ امریکا زیلنسکی کے غیرسنجیدہ رویے کو زیادہ دیر تک برداشت نہیں کرے گا۔ زیلنسکی کے رویے سے لگتا ہے کہ وہ امن نہیں چاہتے، اس لیے ان پر امن مذاکرات کے لیے دباؤ ڈالا جائے گا۔ وائٹ ہاؤس کے مطابق زیلنسکی کو جنگ کے خاتمے کے لیے روس سے مذاکرات کرنا ہوں گے۔

دوسری جانب یوکرین کے صدر زیلنسکی نے سوشل میڈیا پلیٹ فارم ایکس پر جاری اپنے بیان میں کہا کہ یوکرین امریکا اور یورپ کے ساتھ مل کر کام کرنے کے لیے تیار ہے۔ زیلنسکی کا کہنا تھا کہ ہمیں حقیقی امن کی ضرورت ہے اور اس راستے پر واشنگٹن کے ساتھ کی امید ہے۔

انہوں نے کہا کہ جنگ روکنی چاہیے اور سلامتی کو یقینی بنانا ہوگا، جس کے لیے مستقل سفارتکاری اور ضمانت درکار ہے۔ زیلنسکی نے اعتراف کیا کہ جنگ نے یوکرین کو تباہ کردیا ہے اور ہزاروں جانوں کا نقصان ہو چکا ہے۔

اس سے قبل پیر کو امریکی صدر ڈونلڈ ٹرمپ نے یوکرین کے صدر ولودومیر زیلنسکی کو دھمکی دیتے ہوئے اشارہ دیا کہ اگر انہوں نے روس کے ساتھ جنگ بندی کا معاہدہ نہ کیا تو وہ یہاں زیادہ دیر تک نہیں رہیں گے۔

یوکرین میں جنگ بندی کے حوالے سے ڈیل پر امریکی صدر نے میڈیا سے گفتگو کرتے ہوئے کہا کہ ڈیل جلد ہوسکتی ہے، اسے مشکل ڈیل نہیں ہونا چاہیے، لیکن اگر کوئی شخص ڈیل کرنا نہیں چاہتا، تو میرا خیال ہے کہ وہ زیادہ دیر یہاں نہیں رہےگا۔

یاد رہے کہ یوکرینی صدر زیلنسکی جمعہ کو واشنگٹن پہنچے تھے تاکہ وائٹ ہاؤس میں امریکی صدر سے ملاقات کے دوران امریکا اور یوکرین کے درمیان ایک معاہدے پر دستخط کریں، جس کے تحت یوکرین کے وسیع معدنی وسائل کو مشترکہ طور پر استعمال کیا جانا تھا۔ یہ ایک امریکی ثالثی امن معاہدے کے تحت جنگ کے بعد کی بحالی کا حصہ تھا۔

لیکن یوکرینی صدرکی وائٹ ہاؤس میں امریکی صدر ڈونلڈ ٹرمپ کے ساتھ ملاقات میں گرما گرم بحث کے بعد اسے منسوخ کردیا گیا تھا۔