آئی ایم ایف کا گردشی قرضے پر قابو پانے کیلیے اقدامات کا مطالبہ

پاکستان میں عالمی مالیاتی فنڈ (آئی ایم ایف) کے مشن نے اپنے دورے کے دوران حکومت سے گردشی قرضے پر قابو پانے کے لیے ایک واضح اور جامع منصوبہ طلب کیا ہے۔

ذرائع کے مطابق آئی ایم ایف نے 7 ارب ڈالر کے توسیعی فنڈ سہولت پروگرام کے تحت حکومت کو بجلی اور گیس کے گردشی قرضوں کی کمی کے لیے اقدامات سے آگاہ کرنے کی درخواست کی ہے۔

اس حوالے سے وزارت نے بتایا کہ گردشی قرضوں کو کم کرنے کے لیے مختلف اقدامات کیے جا رہے ہیں، جن میں آئی پی پیز (انڈپینڈنٹ پاور پروڈیوسرز) کے ساتھ موجود معاہدوں پر نظرثانی بھی شامل ہے۔

پاکستان کی وزارت توانائی نے آئی ایم ایف مشن کو اب تک کیے گئے اقدامات سے آگاہ کیا ہے۔

آئی ایم ایف نے مزید مطالبہ کیا کہ حکومت بجلی چوری کو روکنے کے لیے کیے گئے اقدامات کے بارے میں بھی تفصیل فراہم کرے۔

آئی ایم ایف کے مشن کو پٹرولیم ڈویژن نے گیس کے شعبے میں اصلاحات کے حوالے سے آگاہ کیا۔ اس میں گیس کے شعبے کے نقصانات کو کم کرنے کے لیے اٹھائے گئے اقدامات اور اصلاحات شامل ہیں۔

ذرائع کے مطابق حکومت نے اس معاملے میں سختی برتنے کی منصوبہ بندی کی ہے تاکہ بجلی کے شعبے کے نقصانات کو کم کیا جا سکے۔