ثابت ہوا جوہر ٹاؤن دھماکہ میں بھارت براہ راست ملوث ہے : فواد چوہدری

تفصیلات کے مطابق وفاقی وزیر اطلاعات فواد چوہدری کا کہنا ہے کہ  بار بار ثابت ہو رہا ہے کہ بھارت کی ریاست اور حکومت پاکستان میں دہشتگردی کے نیٹ ورک کو سپورٹ کر رہی ہے، تحقیقات میں سامنے آیا ہے کہ لاہور دھماکے میں بھارت براہ راست ملوث تھا۔

فواد چوہدری کا کہنا تھا کہ جوہر ٹاؤن میں وی بی آئی ڈی دھماکا ہوا،دھماکے میں 3 افراد جاں بحق ہوئے،دھماکے کے فوری بعد پنجاب پولیس حرکت میں آئی، دھماکے کے 16 گھنٹے کے اندر سی ٹی ڈی تمام ملزمان تک پہنچنے میں کامیاب ہو چکی تھی ۔

دھماکے میں ملوث مجرم پیٹر پال کراچی کا شہری ہے۔ پیٹر پال نے پاکستان کے اندر اور باہر موجود کارندوں میں سہولت کاری کا کام کیا۔ دھماکے کے لیے بیرون ملک سے جو معاونت ہوئی اس کے بھی حقائق ہمارے پاس موجود ہیں۔

انہوں نے بتایا کہ21 تاریخ کو عید گل نے (جوہر ٹاؤن ) علاقے کی ریکی کی، 22 تاریخ کو ملزم نے رکشہ میں بیٹھ کر علاقے کی ریکی کی، 23 تاریخ کو گاڑی اسلام اباد سے لائی گئی تھی ۔

وزیر اطلاعات نے مزید بتایا کہ مجرم عید گل افغان نژاد شہری ہے اور دھماکے میں ملوث سارا گینگ ہمارے قابو میں ہے۔ اس پر تمام تحقیقاتی اداروں کو مبارکباد دیتا ہوں جبکہ لاہور میں دھماکے کی تحقیقات کو انجام تک پہنچانے پر آئی جی پنجاب کو مبارکباد دیتا ہوں۔

مشیر قومی سلامتی معید یوسف کا کہنا تھا کہ پاکستان میں موجود تمام ملزمان قانون کی گرفت میں آگئے ہیں، جوہر ٹاؤن دھماکا اور سائبر حملے ایک ساتھ جڑے ہوئے ہیں،جس دن دھماکا ہوا، ہمارے انوسٹی گیشن نیٹ ورک پر سائبر حملے کیےگئے، ہمارے ادارے سائبر سیکورٹی پر کام کرکے بہت مضبوط ہوگئے ہیں۔ 

معید یوسف کا کہنا تھا کہ بھارت کے اصل چہرے کو سامنے لائيں گے، لاہور دھماکے سے توجہ ہٹانے کے لیے مقبوضہ کشمیر میں ڈرون حملے کا ڈرامہ کیا گیا،اتنے ثبوت ملنے کے بعد بھی دنیا خاموش رہے تو ثابت ہوجائےگا کہ اس کی دلچسپی امن میں نہیں ہے۔ 

ان کا کہنا تھا کہ وقت آگیا ہے کہ افغان مہاجرین کی پاکستان سے وطن باعزت واپسی ہو، افغان مہاجرین امن پسند ہیں ، دہشت گردی کے واقعات سے ان کی بدنامی ہوتی ہے۔