نادرا کی شہریوں سے اپیل ،اپنے خاندان کے فوت شدہ افراد کے شناختی کارڈ منسوخ کرائیں

اسلام آباد:نیشنل ڈیٹابیس اینڈ رجسٹریشن اتھارٹی (نادرا) کی جانب سے شہریوں سے پرزور اپیل کی گئی ہے کہ وہ اپنے خاندان کے فوت شدہ افراد کے شناختی کارڈ لازماً منسوخ کرائیں۔
 ترجمان نادرا کے مطابق ملک بھر میں 70 لاکھ شہریوں کی فوتگی کا اندراج یونین کونسلز کے شہری رجسٹریشن مینجمنٹ سسٹم (CRMS) میں موجود ہے، لیکن قریبی رشتہ داروں نے نادرا میں ان کے شناختی کارڈ کی منسوخی نہیں کرائی، جو ایک قانونی تقاضا ہے۔
 ترجمان نادرا نے مزید بتایا کہ نادرا کی جانب سے دستیاب موبائل نمبرز پر ایس ایم ایس بھیجے جا رہے ہیں جن کے ذریعے شہریوں سے اپیل کی گئی ہے کہ مرحومین کے قریبی رشتہ دار  یعنی بیٹا/بیٹی، شریک حیات یا والدین میں سے کوئی ایک فوری طور پر کسی بھی نادرا مرکز سے بغیر کسی فیس کے متوفی کا شناختی کارڈ منسوخ کرائیں۔
خیال رہے کہ مرحومین کے شناختی کارڈ منسوخ نہ کرانے کی صورت میں متوفی کے قریبی رشتہ داروں یعنی بیٹا/بیٹی، شریک حیات یا والدین کو اپنی شناختی دستاویزات کی نادرا میں پروسیسنگ میں مشکلات کا سامنا کرنا پڑ سکتا ہے۔
 علاوہ ازیں، شہریوں کے لئے ضروری ہے کہ اگر فوتگی کا اندراج غلط ہے تو متعلقہ یونین کونسل سیکرٹری سے ریکارڈ کی تصحیح کروائیں۔