ملک اس وقت دہشت گردی کی لپیٹ میں ہے ہمیں ایک ہونا چاہیے، بیرسٹر گوہر خان

اسلام آباد:چئیرمین پی ٹی آئی بیرسٹر گوہر خان نے کہا ہے کہ ملک اس وقت دہشتگردی کی لپیٹ میں ہے ہمیںایک ہونا چاہیے۔
بیرسٹر گوہر نے قومی اسمبلی میں اظہار خیال کرتے ہوئے کہا کہ پاک فوج ملک کیلئے قربانیاں دے رہی ہے، سیکیورٹی فورسز کی کوششوں کو سراہتے ہیں، دہشتگردوں نے بولان میں شہریوں کو نشانہ بنایا۔
چیئرمین پی ٹی آئی بیرسٹر گوہر کا کہنا تھا کہ سانحہ جعفر ایکسپریس کی شدید مذمت کرتے ہیں، دہشت گردوں نے معصوم شہریوں کو نشانہ بنایا، یہ اندوہناک واقعہ ہے، پاکستان کے عوام اس سے بہت متاثر ہوئے،انہوں نے کہا کہ بولان میں ہمارے سکیورٹی فورسز کے 4 جوان اور 20 مسافر شہید ہوئے جن کے اہلخانہ کے ساتھ دلی ہمدردی ہے۔
انہوں نے کہا کہ مسلح افواج نے بولان آپریشن کامیابی سے مکمل کیا،انہوں نے مزید کہا کہ ایوان میں رولز کی پاسداری ہونی چاہیے۔
اسمبلی سے خطاب کرتے ہوئے بیرسٹر گوہر کا کہنا تھا کہ ہم پوائنٹ آف آرڈر مانگیں تو اکثر ملتا نہیں، پوائنٹ آف آرڈر مل جائے تو وقت پورا نہیں دیتے، پارلیمنٹ میں ہماری بات کو میوٹ نہ کیا جائے، آئین میں بھی لکھا ہے 130 دن سیشن ہو، آخری بار بھی 89 دن سیشن چلا۔
انہوں نے کہا کہ جب کوئی بل آئے اور کوئی قانون بنتا ہے تو اس پر بھی گفتگو ہونی چاہیے، صدر صاحب نے دوسری بار خطاب کیا ہے، رولز کی پاسداری ہونی چاہیے، ایوان کی پاسداری ہونی چاہیے، اس طرح کسی ایک کیلئے بھی حالات سازگار نہیں ہوں گے۔
تحریک انصاف کے چیئرمین نے کہا کہ آئین و قانون میں سب کچھ واضح ہے، ہمیں ماضی کو بھول کر آگے کی طرف بڑھنا ہوگا، جس پر سپیکر قومی اسمبلی سردار ایاز صادق نے کہا کہ میں نے تو ماضی کو بھولنے کی بہت کوشش کی لیکن آپ بھولنے نہیں دیتے۔