بھارتی میڈیا کی کمپین پاکستان میں ایک سیاسی جماعت چلا رہی ہے، عظمیٰ بخاری

لاہور:صوبائی وزیر اطلاعات پنجاب عظمی بخاری کا کہنا ہے کہ بھارتی میڈیا کی کمپین پاکستان میں ایک سیاسی جماعت چلا رہی ہے۔
لاہور میں پریس کانفرنس کرتے ہوئےصوبائی وزیر اطلاعات عظمیٰ بخاری نے پریس کانفرنس کرتے ہوئے کہا کہ دہشت گردی نے پورے پاکستان کو اپنی لپیٹ میں لیا ہوا ہے۔ اور ہر طرح کی دہشت گردی کے واقعات کی مذمت کرتے ہیں۔
انہوں نے کہا کہ پاکستان میں دہشت گردی کی بڑی لہر آئی ہے۔ اور جوان اپنے خون سے پاک سرزمین کو بچانے کی کوشش کر رہے ہیں۔ ایک ہی دن میں دہشت گردی کے کئی واقعات دیکھنے کو مل رہے ہیں،ان کا کہنا تھاکہ پشاور، نوشکی اور جعفر ایکسپریس واقعے کی مذمت کرتے ہیں۔
پریس کانفرنس میں عظمیٰ بخاری نے کہا کہ سیکیورٹی فورسز کو کلیئرنس آپریشن کرنے پر خراج تحسین پیش کرتے ہیں، ایسے واقعات میں ملک اور اداروں کے ساتھ کھڑے ہونا ہوتا ہے۔ لیکن ایسے واقعات میں ایک جماعت زہریلی مہم شروع کر دیتی ہے۔ جس سے دشمن قوتیں فائدہ اٹھاتی ہیں۔
وزیر اطلاعات نے کہا کہ بہادر جوانوں کی وجہ سے ہم سکون کی نیند سو رہے ہوتے ہیں۔ اور جو کمپین بھارتی میڈیا کر رہا تھا ایک سیاسی جماعت وہی کمپین کر رہی تھی۔ جبکہ بھگوڑے پاکستان سے باہر بیٹھ کر سازش کر رہے ہیں،ان کا کہناتھا کہ جو مشکل وقت میں یک زبان نہ ہو وہ پاکستانی نہیں ہو سکتا۔
انہوں نے مزید کہا کہ خیبرپختونخوا دہشت گردی کا شکار ہے۔ اور خیبرپختونخوا کے 3 اضلاع میں کرفیو نافذ کرنے کی بھی رپورٹس ہیں۔ خیبرپختونخوا میں ایک دن میں 8 مختلف جگہوں پر حملے ہوئے۔
انہوں نے کہا کہ دہشت گردی کے تانے بانے افغانستان سے ملتے ہیں۔ اور پاکستان میں دہشت گردی کے لیے افغان سرزمین استعمال ہو رہی ہے۔ وزیر اعلیٰ خیبر پختونخوا کس بنیاد پر افغانیوں کو شہریت دینے کی بات کر رہے ہیں۔