ملک میں کوئی آپریشن نہیں ہورہا اور نہ ہی کوئی آپریشن کی بات ہوئی، طلال چوہدری

اسلام آباد:وزیر مملکت برائے داخلہ طلال چوہدری نے وزیر اعلیٰ خیبرپختونخوا کے بیان پر ردعمل دیتے ہوئے کہا ہے کہ کوئی آپریشن نہیں ہورہا اور نہ ہی کوئی آپریشن کی بات ہوئی۔
اسلام آبادمیں پریس کانفرنس کرتے ہوئے طلال چوہدری نے کہا کہ وزیراعلیٰ علی امین گنڈا پور نے کہا کہ کسی آپریشن کی اجازت نہیں دیں گے، وہ واضح کرنا چاہتے ہیں کہ کوئی آپریشن نہیں ہورہا اور نہ ہی کوئی آپریشن کی بات ہوئی ہے، وزیراعلیٰ کے پی کے قومی سلامتی کے اجلاس سے متعلق کنفیوژن پیدا کررہے ہیں۔
طلال چوہدری نے کہا کہ وزیراعلیٰ خیبر پختونخوا اگر دہشت گردوں کے خلاف کھڑے نہیں ہوسکتے تو ان کے دوست نہ بنیں۔
پریس کانفرنس میں ان کاکہنا تھا کہ فیصلہ کرلیا گیا ہے کہ ہر کوئی اپنا قومی فرض نبھائے، کے پی سے آنے والی یہ آوازیں آپ کی حب الوطنی پر بھی سوال اٹھاتی ہیں، بنوں مسجد پر حملے کی بانی پی ٹی آئی نے آج تک مذمت نہیں کی۔
با نی پی ٹی آئی اور تحریک انصاف پر تنقید کرتے ہوئے انہوں نے کہا کہ دہشت گردوں کے پیٹرن ان چیف بانی پی ٹی آئی ہیں، بنوں ہو یا لکی مروت، لوگوں نے خود نکل کر سیکیورٹی فورسز کا ساتھ دیا ہے۔
طلال چوہدری کا کہنا تھا کہ ہتھیار اٹھانے والوں سے ہتھیار کی زبان میں بات ہورہی ہے، مذاکرات تو ان سے ہوتے ہیں جن کے ہاتھ میں بندوق نہیں ہوتی۔
وزیر مملکت برائے داخلہ نےمزیدکہا کہ انٹیلیجنس اداروں کی ناکامی کی بات کرنے والے بتائیں کہ کے پی کے میں 13سال سے پی ٹی آئی کی حکومت ہے، وہاں کس کی ناکامی ہے؟ وزیر مملکت کا کہنا تھا کہ خیبرپختونخوا حکومت کو 800 ارب روپے دیے گئے 8 ارب بھی نہیں لگائے گئے۔