مہنگا سونا پھر مہنگا، قیمت تاریخ کی نئی بلند ترین سطح پر پہنچ گئی

کراچی: مہنگا سونا ایک بار پھر مہنگا ہو گیا جس کے بعد عالمی و مقامی مارکیٹوں میں سونے کی قیمت تاریخ کی بلند ترین سطح پر پہنچ گئی۔
آل پاکستان جیمز اینڈ جیولرز ایسوسی ایشن کے مطابق آج ہفتے کے روز مقامی مارکیٹ میں 24 قیرط کے حامل سونے کی فی تولہ قیمت میں 1620 روپے کا اضافہ ہونے کے بعد نئی قیمت 3 لاکھ 25 ہزار روپے ہوگئی ہے، جو کہ ملکی تاریخ میں بلند ترین قیمت ہے۔
 اسی طرح فی 10 گرام سونے کی قیمت بھی 1389 روپے کے اضافے سے 2 لاکھ 78 ہزار 635 روپے کی بلند ترین سطح کو چھو گئی ہے۔
عالمی بلین مارکیٹ میںسونے کی فی اونس  قیمت میں مزید 10 ڈالر کا اضافہ ریکارڈ ہوا، جس کے نتیجے میں نئی عالمی قیمت 3084 ڈالر فی اونس کی بلند ترین سطح کو چھو گئی۔
دوسری جانب سونے کی قیمتوں میں اضافے کے برعکس ملک میں فی تولہ چاندی کی قیمت 30روپے کی کمی سے 3580روپے کی سطح پر آگئی اور اسی طرح فی 10 گرام چاندی کی قیمت بھی 27روپے کی کمی سے 3069روپے کی سطح پر آگئی۔