مستونگ: بی این پی سربراہ سردار اختر مینگل کی سربراہی میں دھرنے کے قریب خودکش دھماکا

مستونگ: بلوچستان کے ضلع مستونگ میں لک پاس کے مقام پر بلوچستان نیشنل پارٹی (بی این پی مینگل) کے دھرنے کے قریب خود کش حملہ آور نے خود کو دھماکے سے اڑا دیا۔
 لیویز ذرائع نے دعویٰ کیا کہ دھماکے میں کوئی جانی نقصان نہیں ہوا، دھماکہ بی این پی کے جاری دھرنے کے مقام سے کچھ فاصلے پر ہوا۔    دھماکا میں بی این پی قیادت اور کارکنا ن محفوظ رہے۔
 سیکیورٹی زرائع کا کہنا ہے کہ ریسکیو ٹیمیں جائے وقوع کے جانب روانہ کردی گئیں جب کہ قانون نافذ کرنے والے اداروں نے علاقے کو گھیرے میں لے لیا ہے۔

دوسری جانب ترجمان بلوچستان حکومت  شاہد رند نے کہا ہے کہ سردار اختر مینگل اور بی این پی قیادت اور شرکا محفوظ ہیں،ان کا کہنا تھا کہ واقعے کی چھان بین کی جا رہی ہے، لک پاس دھماکے کے مقام کے قریب بلوچستان نیشنل پارٹی کا دھرنا جاری تھا، دھماکے سے کسی کو نقصان نہیں پہنچا۔

ترجمانشاہد رند نے سردار اختر مینگل اور ان کی جماعت سے اپیل کی کہ حکومت سے تعاون کریں، ان کا کہنا تھا کہ بی این پی وفد کی گزشتہ رات انتظامیہ سے ملاقات ہوئی۔

ترجمان  نے مزید کہا کہ انتظامیہ کے ساتھ رابطہ رہا اور بیک ڈور ڈپلومیسی ہوتی رہی،حکومتی وفد آج سردار اختر مینگل سے ملاقات کرے گا، کمیٹی ارکان راستے میں ہی تھے کہ یہ واقعہ پیش آ گیا۔