آئین کے مطابق صدر نئی کینالز کی منظوری نہیں دے سکتا،مراد علی شاہ

کراچی:وزیراعلیٰ سندھ مرادعلی شاہ نے کہا ہے کہ آئین کے مطابق صدر نئی کینالز کی منظوری نہیں دے سکتا۔
وزیراعلیٰ سندھ سید مرادعلی شاہ نے کراچی میں نیوز کانفرنس کرتے ہوئے کہا کہ دریائے سندھ میں پانی کی کمی ہوئی ہے، نگراں حکومت میں چولستان کو آباد کرنے کیلئے نئی نہروں کا فیصلہ ہوا، جبکہ جنوری میں پنجاب حکومت نے پروپوزل بنایا۔
مرادعلی شاہ نے کہا کہ پنجاب حکومت کے پروپوزل میں چولستان کو آباد کرنے کا ذکر تھا، 17جنوری 2024 کو معاملہ ارسا میں گیا، جس کے بعد ارسا نے اس منصوبے کی منظوری دی۔
وزیر اعلی مراد علی شاہ نے کہا کہ جب یہ معاملہ ایکنک میں آیا تو سندھ کے نمائندے نے اس پر اعتراض کیا اور اس کے بعد سی سی آئی میں یہ معاملہ اٹھایا گیا۔
نیوز کانفرنس سے خطاب کرتے ہوئے انہوں نے مزید کہا کہ آٹھ جولائی کے اجلاس کے منٹس درست نہیں ہےاور اس حوالے سے سندھ حکومت کی حمایت کے بغیر وفاقی حکومت ملک میں کوئی فیصلہ نہیں کر سکتی۔انہوں نے کہا ملک میں نئی کینالز کے لیے پانی دستیاب نہیں،ان کا مزید کہنا تھا کہ پیپلز پارٹی کے بغیر وفاقی حکومت نہیں چل سکتی ہے، سی سی آئی میں معاملہ آئے بغیر اس پر یہ کچھ نہیں کر سکتے۔
مراد علی شاہ نے کہا کہ صدر آصف زرداری کی زیر صدارت میٹنگ میں کسی بھی نئی کینال کی منظوری نہیں دی گئی تھی، اور میٹنگ کے منٹس غلط طریقے سے جاری کیے گئے۔
انہوں نے مزید کہا کہ اس وقت پانی کا مسئلہ پوری دنیا کا مسئلہ ہے، دریائے سندھ میں بھی پانی کی کمی کا مکمل ریکارڈ ہے، محکمہ ایریگیشن سندھ متحرک ہے، ایسا نہیں ہوسکتا کہ دریا پر کوئی کچھ بنالے،انہوں نے کہا کہ صدرمملکت نے پارلیمنٹ سے خطاب میں واضح کہا دریائے سندھ پر نئی کینالز پر اعتراض ہے۔
 مراد علی شاہ نے کہا کہ پروپیگنڈا کیا گیا کہ کینالز کے معاملے میں سندھ حکومت شامل ہے، ہم نے لڑنے اور بندوق اٹھانے کا نہیں کہا، بلکہ ہم نے آئینی راستہ اپنایا ہے۔