واٹس ایپ نے صارفین کے لیے اسٹیٹس میں میوزک شامل کرنے کا فیچر متعارف کروا دیا

عالمی سطح پر مقبول میسیجنگ ایپ واٹس ایپ میںصارفین کی سہولت کت لیے ایک بہترین فیچر کا اضافہ کیا جارہا ہے جس کے ذریعے صارفین اپنی پروفائل اپ ڈیٹس میں عارضی میوزک کلپس کو شامل کرسکیں گے۔
اس نئے فیچر کے تحت واٹس ایپ صارفین اپنے  اسٹیٹس میں اب  سونگ کلپس  کو بھی باآسانی شامل کرسکیں گے۔
کمپنی کے مطابق دنیا بھر کے صارفین کے لیے اس فیچر کو متعارف کرانے کا سلسلہ شروع ہوگیا ہے اور یہ آنے والے ہفتوں میں تمام صارفین کو دستیاب ہوگا۔
یہ اسٹیٹس فیچر واٹس ایپ  اپ ڈیٹس کے طور پر ایپ  میں موجود ہے  جسے صارفین فیس بک اور انسٹاگرام پر دستیاب اسٹوریز فیچر کی طرح 24 گھنٹے بعد ازخود غائب ہوجانے والے ٹیکسٹ، تصویر اور ویڈیو پیغامات کو شیئر کرنے کے لیے استعمال کرتے ہیں۔
اس فیچر کو استعمال کیسے کیا جائے گا؟
اسٹیٹس اپ ڈیٹ کرتے وقت واٹس ایپ صارفین کو اسکرین کے اوپری حصے میں ایک میوزک نوٹ آئیکن نظر آئے گا یہ آئیکن صارفین کوواٹس ایپ اسٹیٹس میں میوزک کو شامل کرنے کی اجازت دے گا۔
اس فیچر کے تحت صارفین تصویر پر مشتمل اسٹیٹس  کے لیے  15 سیکنڈ کا میوزک اور ویڈیو کے لیے 60 سیکنڈ پر مشتمل میوزک شامل کرسکتے ہیں۔
 کمپنی کے مطابق واٹس ایپ کی میوزک  لائبریری میں اسٹیٹس کیلئے لاکھوں میوزک موجود ہیں جہاں صارف اپنی مرضی سے ٹریک کا درست حصہ اسٹیٹس ساؤنڈ کے طور پر  استعمال کرسکتے ہیں۔