سکیورٹی فورسز کا ضلع قلات میں آپریشن، چھ دہشت گردوں ہلاک

سکیورٹی فورسز نے بلوچستان کے ضلع قلات میں خفیہ اطلاعات پر آپریشن کرتے ہوئے چھ دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق، آپریشن کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس میں چھ دہشت گرد مارے گئے۔ ہلاک دہشت گرد معصوم شہریوں کے خلاف کارروائیوں میں ملوث رہے تھے۔

آئی ایس پی آر کا مزید کہنا تھا کہ علاقے میں کسی بھی دیگر دہشت گرد کی موجودگی کے پیش نظر سینی ٹائزیشن آپریشن جاری ہے تاکہ امن و امان کو یقینی بنایا جا سکے۔ سکیورٹی فورسز بلوچستان کے امن، استحکام اور ترقی کے لیے پرعزم ہیں۔

دوسری جانب، وزیرِاعظم نے قلات میں دہشت گردوں کے خلاف کامیاب کارروائی پر سکیورٹی فورسز کی تعریف کرتے ہوئے کہا کہ دہشت گردی کے مکمل خاتمے تک یہ جنگ جاری رہے گی۔

وزیرِاعظم نے اس عزم کا اظہار کیا کہ پوری قوم اپنے بہادر جوانوں کے ساتھ کھڑی ہے اور دہشت گردوں کے خلاف کارروائیاں بلا تعطل جاری رہیں گی۔