اسرائیلی فوج کی عید کے روز بھی غزہ پر وحشیانہ کارروائیاں جاری ، مزید 24 فلسطینی شہید

اسرائیلی فوج کی غزہ پروحشیانہ کارروائیاں جاری ہیں، مزید چوبیس فلسطینی شہید ہوگئے۔

عرب میڈیا کے مطابق خان یونس میں 18 افراد شہید ہوئے۔ مارچ سے اب تک 9 سو 21 فلسطینی شہید ہوچکے۔

دوسری جانب مصر اور قطر کی ثالثی میں غزہ جنگ بندی کے لیے مذاکرات میں اہم پیش رفت ہوئی ہے۔ حماس نے غزہ میں جنگ بندی کی نئی تجویز پر رضا مندی ظاہر کردی ہے۔

انہوں نے کہا امید ہے اسرائیل بھی نئی جنگ بندی تجویز میں رخنہ نہیں ڈالے گا۔ حماس نے 5 یرغمالی رہا کرنے پر اتفاق کیا جبکہ اسرائیل نے دس یرغمالی رہا کرنے کا مطالبہ کیا ہے۔

حماس رہنما کا کہنا ہے حماس غزہ میں حکومتی طاقت سے دستبردار ہونے کو تیار ہے ۔۔ مسلح مزاحمتی گروپ اپنی ذمہ داریوں سے دستبردار نہیں ہوں گے۔

شہریوں نے کہا کہ غزہ میں زندگی اذیت ناک ہے، کچھ کھاتے ہیں، کچھ لوگ بھوکے رہتے ہیں، صرف اللہ ہی جانتا ہے کہ لوگوں کا کیا حال ہے، دنیا سے سوال ہے کہ کیا ہم انسان نہیں ہیں؟ کیا ہمارے بچوں کو دنیا کے تمام بچوں کی طرح خوش رہنے کا حق نہیں ہے؟

واضح رہے کہ غزہ میں وحشیانہ اسرائیلی حملوں میں اب تک 50 ہزار سے زائد فلسطینی شہید ہوچکے ہیں، غزہ کا بیشتر حصہ ملنے کا ڈھیر بن چکا ہے، لاکھوں فلسطینی خیموں یا بمباری سے تباہ شدہ عمارتوں میں پناہ لینے پر مجبور ہیں۔