چیف منسٹر چلڈرن ہارٹ سرجری پروگرام کے تحت 3ہزار 162 بچوں کی کامیاب سرجری

لاہور:وزیر اعلی پنجاب مریم نواز شریف کی جانب سے شروع کر دہ ’’چیف منسٹر چلڈرن ہارٹ سرجری پروگرام‘‘ کے تحت 3ہزار 162 بچوں کی کامیاب ہارٹ سرجری کی گئی۔
وزیراعلیٰ مریم نواز کی ہدایت پر ہر ماہ غیر ملکی چلڈرن ہارٹ سرجن کی ٹیم دورہ کرے گی۔
اس پروگرام کے تحت ملک بھر سے 7436 مریض بچوں کی رجسٹریشن ہو چکی ہے،جس میں خیبرپختونخوا کے 316 بچوں کابھی پنجاب کے اسپتالوں میں مفت سرجری اور علاج ہوگا۔
اسی طرح سندھ سے چلڈرن ہارٹ سرجری پروگرام کیلئے 51 بچوں کی رجسٹریشن کرائی گئی،بلوچستان سے11، آزاد کشمیر سے158بچوں نے ہارٹ سرجری کیلئے رجسٹریشن کرائی،پروگرام کے تحت گلگت بلتستان کے 30بچوں کی ہارٹ سرجری ہوگی۔
سرکاری اسپتالوں میں 2419اور پرائیویٹ اسپتالوں میں 743 آپریشن ہو چکے ہیں،چلڈرن ہارٹ سرجری اور علاج کے اخراجات حکومت پنجاب ادا کررہی ہے۔
وزیر اعلیٰ پنجاب مریم نواز نے کہا کہ ننھے بچوں کی تکلیف برداشت نہیں، ہارٹ سرجری کے اخراجات حکومت دے گی،حکومت کے وسائل پر پہلا حق بچوں کا ہے۔
انہوں نے مزید کہا کہ سب اپنے بچوں جیسے ہیں، پیدائشی امراض قلب میں مبتلا بچوں کا علاج ممکن حد تک جلد اور مفت ہوگا۔