بہاولپور :11 سالہ بچی سے اجتماعی زیادتی میں ملوث 4 ملزمان مبینہ پولیس مقابلے میں ہلاک

بہاولپور میں 11 سالہ بچی سے اجتماعی زیادتی کرکے اسے قتل کرنے والے چاروں ملزمان مبینہ پولیس مقابلے میں مارے گئے۔
تفصیلات کے مطابق بہاولپور تھانہ صدر کے علاقے باقر میں چند روز قبل 11 سالہ بچی فضا کو اجمتاعی زیادتی کے بعد بچی کو قتل کرنے کے چاروں ملزمان مبینہ پولیس مقابلے میں مارے گئے جبکہ ملزمان 4 روز سے پولیس حراست میں تھے۔
پولیس کی جانب سے جاری بیان کے مطابق پولیس چاروں ملزمان کو مال مقدمے کی ریکوری کے لیے لے جارہی تھی کہ ملزمان کو پولیس سے چھڑانے کے لیے ان کے ساتھیوں نے پولیس پر فائرنگ کردی۔
بیان میں مزید بتایا گیا کہ چاروں ملزمان انس، کامران، محمود اور عمر نے فائرنگ کے دوران خود کو پولیس سے چھڑوا کر فرار ہونے کی کوشش کی تاہم چاروں ملزمان اپنے ہی ساتھیوں کی فائرنگ کا نشانہ بن بیٹھے۔
 پولیس کا کہنا ہے کہ فائرنگ کرنے والے نامعلوم ملزمان فرار ہوگئے ہیں جن کی تلاش کے لیے سرچ آپریشن شروع کر دیا گیا ہے۔ 
پولیس نے بچی اور ملزمان کی ڈی این اے رپورٹ میچ ہونے کے بعد چاروں ملزمان کو گرفتار کیا تھا جن میں سے دو ملزمان مقتولہ بچی کے ماموں جبکہ دو قریبی رشتہ دار تھے، دوران حراست و تفتیش ملزمان نے بچی سے زیادتی اور قتل کا اعتراف بھی کیا تھا۔
خیال رہے کہ چند روز قبل درندہ صفت ملزمان نے چند روز قبل 11سالہ بچی کو زیادتی کے بعد گلا کاٹ کر قتل کردیا تھا۔