آئی ایم ایف نے دو ماہ میں دوسرا مشن پاکستان بھیج دیا

عالمی مالیاتی فنڈ(آئی ایم ایف) نے دو ماہ میں دوسرا مشن پاکستان بھیج دیا، جو  ملک میں گورننس میں بہتری اور کرپشن کے خاتمے کیلئے اصلاحات کا جائزہ لے گا۔

آئی ایم ایف مشن بینکنگ سیکٹر،  تعمیراتی اور شوگر سیکٹر میں مسابقت کا جائزہ لے گا، جبکہ آئی ایم ایف وفد کی سپریم کورٹ اور احتساب عدالت کے رجسٹرارز سے بھی ملاقات متوقع ہے۔

ذرائع نے بتایا کہ آئی ایم ایف مشن نے ابتدائی ملاقاتیں شروع کر دیں ہیں تاہم پیر سے باقاعدہ بات چیت کا آغازہوگا۔

ذرائع کے مطابق آئی ایم ایف مشن تیس مختلف محکموں کے ساتھ مذاکرات کرے گا، جس میں وزارت خزانہ،  اسٹیٹ بینک،  ایف بی آر ، منصوبہ بندی کمیشن اور نجکاری کمیشن شامل ہیں، اس کے علاوہ آڈیٹر جنرل، نیب، ایف آئی اے، اوگرا، نیپرا اور پی ٹی اے حکام سے مذاکرات کیے جائیں گے۔