انڈر 23ورلڈ اسکواش چیمپئن شپ: پاکستان کے نور زمان نے ٹائٹل اپنے نام کرلیا

کراچی:پاکستان کے نور زمان نے انڈر 23 ورلڈ اسکواش چیمپئن شپ مینز ایونٹ کا ٹائٹل جیت لیا۔
کراچی میں کھیلے گئے فائنل میں نور زمان نے  مصر کے کریم التورکی کو  2-3 سے شکست دی،ابتدا کے 2 گیمز میں دو صفر کے خسارے سے شاندار کم بیک کے بعد نور زمان نے 3 سیٹ سےکامیابی حاصل کی۔
فائنل کے بعد میڈیا سےگفتگو میں نورزمان کا کہنا تھا کہ دو صفر کے خسارے کے بعد سوچ یہی تھی کہ اپنےگیم  پر فوکس کروں، آخری وقت تک فائٹ کرنےکا ذہن میں تھا، بس سوچا تھا کہ جو محنت کی اس کو ثابت کروں، اس وقت خود کو بہت پرسکون محسوس کر رہا ہوں۔
 نورزمان کامزید کہنا تھا کہ کریم التورکی بھارت سے جیت کر آیا تھا ،سوچا تھا آخر تک کھیلوں گا۔
کور کمانڈر لیفٹیننٹ جنرل اویس دستگیر  اور  وزیر اعلیٰ سندھ مراد علی شاہ نے انعامات تقسیم کیے۔
اس موقع پر وزیراعلیٰ سندھ مراد علی شاہ کا کہنا تھا خوشی ہے کہ ورلڈ اسکواش چیمپئن شپ کراچی میں ہوئی ،اس طرح کے ایونٹس یہاں ہونا خوش آئند ہے۔
نورزمان کو ٹائٹل جیتنے پر مبارکباد پیش کرتا ہوں،آج ایک شاندار میچ دیکھنے کو ملا،مصر کے کریم التورکی نے بھی بہترین کھیل کامظاہرہ کیا۔نورزمان کا ٹائٹل جیتنا پاکستان کے لیے اعزاز ہے۔
وزیراعظم نے بھی انڈر 23ورلڈ اسکواش چیمپئن شپ جیتنے پر نور زمان کو خراج تحسین پیش کیا،انہوں نے کہا نور زمان نے اپنے کھیل سے پاکستان کا نام پوری دنیا میں روشن کیا۔
پوری قوم کو نور زمان کی کامیابی پر فخر ہے ،پاکستان اسکواش کے میدان میں اپنا کھویا ہوا مقام دوبارہ حاصل کرے گا۔
وزیر داخلہ اور چیئرمین پی سی بی محسن نقوی نے بھی نور زمان کو شاباش دیتے ہوئے کہا ہے کہ  نور زمان جیسے باصلاحیت نوجوان پاکستان کا قیمتی اثاثہ ہیں۔