کورم پورا نہ ہونے کے باعث قومی اسمبلی اجلاس 14 اپریل تک ملتوی

اسلام آباد: قومی اسمبلی کا اجلاس کورم پورا نہ ہونے کے باعث پیر 14 اپریل 2025 سہ پہر 4 بجے تک ملتوی کردیا گیا۔
تفصیلات کے مطابق جمعہ کو قومی اسمبلی کا اجلاس سپیکر سردار ایاز صادق کی صدارت میں شروع ہوا تاہم پاکستان تحریک انصاف کے رکن اقبال آفریدی نے کورم کی نشاندہی کردی جس پر سپیکر نے برہمی کا اظہار کرتے ہوئے کہا کہ آپ ایوان کی کارروائی چلنے نہیں دیتے۔
سپیکر ایاز صادق نے گنتی شروع کروائی مگر کورم پورا نہ نکلا جس کے باعث اجلاس میں آدھے گھنٹے کا وقفہ دینا پڑا۔
اپوزیشن رکن صاحبزادہ حامد رضا نے کہا کہ آج فلسطین کے مسئلے پر بات ہونا تھی، انہوں نے اپنی ہی جماعت کے رکن کو کورم کی نشاندہی سے روکنے کی کوشش کی۔
دوران اجلاس اسپیکر قومی اسمبلی سردار ایاز صادق نے کہا کہ پیپلز پارٹی نے نہروں کے مسئلے پر سات اپریل کو قرار داد جمع کرائی تھی جس پر ایوان میں متعدد ارکان نے اظہارِ خیال کیا تاہم اپوزیشن نے واک آؤٹ کر دیا، سپیکر کے مطابق جے یو آئی واک آؤٹ کا حصہ نہیں بنی۔
اسپیکر نےمزید کہا کہ اگر نہروں پر بات کرنی ہے تو ایوان میں موجود رہنا ہو گا، آپ لوگ ایوان کو چلنے ہی نہیں دینا چاہتے، کل بھی کورم کی نشاندہی کی گئی، کل بھی وقفہ سوالات میں اپوزیشن کے اہم سوالات شامل تھے، آج بھی ہیں۔
 تاہم بعدازاں کورم کی کمی کے باعث اجلاس پیر تک ملتوی کردیا گیا۔
یاد ر ہے کہ گزشتہ روز نہروں کے معاملے پر 30 سے زائد ممبران نے بحث میں حصہ لیا تاہم اپوزیشن نے بائیکاٹ کیا۔