بیرسٹر سیف کا وزیر خزانہ محمد اورنگزیب کے حالیہ اعترافی بیان پر سخت ردعمل

مشیر اطلاعات خیبرپختونخوا بیرسٹر سیف نے وفاقی وزیر خزانہ محمد اورنگزیب کے حالیہ اعترافی بیان پر سخت ردعمل دیتے ہوئے کہا ہے کہ وزیر خزانہ نے مہنگائی پر قابو نہ پانے اور ایف بی آر میں بدعنوانی کا برملا اعتراف کیا ہے، جو حکومت کے دعوؤں کی قلعی کھولنے کے لیے کافی ہے۔

بیرسٹر سیف نے کہا کہ وزیر خزانہ ایک ذمہ دار شخصیت ہیں، جنہوں نے خود ہی عوام کے سامنے جعلی حکومت کے جھوٹے دعوؤں کی حقیقت بیان کر دی ہے۔  وزیراعظم شہباز شریف اور وزیر خزانہ محمد اورنگزیب ایک صفحے پر دکھائی نہیں دیتے، جس سے حکومت کی ناتجربہ کاری اور اندرونی خلفشار واضح ہو گیا ہے۔

انہوں نے طنزیہ انداز میں کہا کہ اب کم از کم شہباز شریف کی آواز کو موبائل کی رنگ ٹون سے ہٹا دینا چاہیے، کیونکہ عوام اس آواز سے اتنے تنگ آ چکے ہیں کہ انہوں نے ایک دوسرے کو کال کرنا بھی چھوڑ دیا ہے۔ ان کا مزید کہنا تھا کہ مارکیٹوں میں خریداری جب شہباز شریف کی رنگ ٹون بجتی ہے تو لوگ غصے میں آ جاتے ہیں۔

بیرسٹر سیف نے حکومت پر تنقید کرتے ہوئے کہا کہ جعلی حکومت اور اس کے کھوکھلے دعوے اب مزید نہیں چلیں گے، عوام کو حقیقی ریلیف کی ضرورت ہے، نہ کہ طفل تسلیوں اور دکھاوے پر مبنی بیانات کی۔

انہوں نے مطالبہ کیا کہ حکومت سنجیدگی کا مظاہرہ کرے اور فوری طور پر عوامی مسائل کے حل کے لیے ٹھوس اقدامات اٹھائے۔