قائمہ کمیٹی برائے دفاع کی جانب سے پہلگام واقعے پر بھارتی الزامات متفقہ طور پر بے بنیاد قرار

 قومی اسمبلی کی قائمہ کمیٹی برائے دفاع نے پہلگام واقعے پر بھارتی الزامات متفقہ طور پر بے بنیاد قرار دے دیا۔

اجلاس کے دوران قومی اسمبلی کی دفاعی کمیٹی نے بھارت کے یکطرفہ اقدامات پر شدید ردعمل دیا اور تمام سیاسی جماعتوں نے بھارتی بیانیے کو مسترد کر دیا۔

اس موقع پر کمیٹی کا کہنا تھا کہ پاکستان دہشت گردی کا شکار رہا، عالمی برادری الزامات کا نوٹس لے ، قومی اسمبلی کی قائمہ کمیٹی دفاع نے بھارت کی جانب سے سندھ طاس معاہدے کی معطلی پر بھی تشویش ظاہر کی اور واہگہ و اٹاری بارڈر کی بندش اور سفارتی عملے کی واپسی کو کشیدگی میں اضافہ قرار دیا۔

اجلاس کے دوران کمیٹی نے واضح پیغام دیا کہ غیر ضروری اقدام کی صورت میں مؤثر جواب دیا جائے گا ، قومی اسمبلی کی قائمہ کمیٹی برائے دفاع کے اراکین متفق ہیں کہ سیاست سے بالاتر ہو کر دفاعِ وطن پر یکجہتی کا مظاہرہ کریں۔

اس کے علاوہ اجلاس میں سیکرٹری دفاع لیفٹیننٹ جنرل (ر) محمد علی HI(M)، ایڈیشنل سیکریٹری (آرمی) میجر جنرل عامر اشفاق کیانی، وزارت قانون و انصاف، دفاع اور صوبائی حکومتوں کے دیگر اعلیٰ افسران بھی موجود تھے۔

واضح رہے کہ اجلاس میں اراکین قومی اسمبلی عقیل ملک، ابرار احمد، صباء صادق، اسپندیار بندارہ، صلاح الدین جونیجو، سنجے پروانی، گل اصغر خان، پلین بلوچ، محمد اسلم گھمن، غلام محمد اور محترمہ زیب جعفر (پارلیمانی سیکریٹری برائے دفاع) نے شرکت کی۔