ایران کے شہر بندر عباس میں زور دار دھماکے، 281 سے زائد افراد زخمی 

تہران:ایران کے شہربندر عباس میں زوردار دھماکوں اور آگ لگنے کے نتیجے میں 281 افراد زخمی ہو گئے۔
ایرانی میڈیا رپورٹس کے مطابق دھماکے بندر عباس بندرگاہ پر کنٹینر پھٹنے کی وجہ سے ہوئے۔ ہرموزگان کے کرائسز مینجمنٹ چیف مہرداد حسن زادہ نے کہا کہ یہ دھماکے بندرگاہ کے صحن میں ذخیرہ کیے گئے کئی کنٹینرز کے پھٹنے سے ہوئے، زخمیوں کو باہر نکالا جا رہا ہے۔
ایران کی کسٹم اتھارٹی نے ایک بیان میں کہا کہ ہفتے کے روز ہونے والا دھماکا سینا کنٹینر یارڈ میں ہوا،جس کے نتیجے میں 281 افراد کے زخمی ہونے کی اطلاعات ہیں، تاہم کوئی جانی نقصان تاحال سامنے نہیں آیا۔
 ایران کے جنوبی شہر بندر عباس میں واقع شاہد راجی بندرگاہ پر دھماکے کی ویڈیو مقامی میڈیا میں شائع ہوئی ہے، ہلاکتوں کی وجوہات یا ممکنہ ہلاکتوں کے بارے میں کوئی سرکاری تفصیلات فوری طور پر دستیاب نہیں ہیں۔
صوبہ ہرمزگان کی کرائسس مینجمنٹ آرگنائزیشن کے ڈائریکٹر مہرداد حسن زادہ نے سرکاری ٹیلی ویژن کو بتایا کہ زخمیوں کو طبی مراکز میں منتقل کر دیا گیا ہے، سیکیورٹی حکام نے اس سے قبل جائے وقوعہ کا دورہ کیا تھا اور حفاظتی وارننگ جاری کی تھی۔
اس سے قبل ہرمزگان پورٹس اینڈ میری ٹائم ایڈمنسٹریشن کے عہدیدار اسماعیل مالکی زادہ نے کہا تھا کہ دھماکا شاہد راجی بندرگاہ کے قریب ہوا۔
 ایرانی نیوز اجنسی تسنیم کا کہنا ہے کہ ایک فیول ٹینک نامعلوم وجوہات کی بنا پر پھٹ گیا، جس کے بعد فوری امدادی ٹیمیں موقع پر پہنچیں اور بندرگاہ کی تمام سرگرمیاں روک دی گئیں۔