غزہ میں اسرائیلی جارحیت جاری،بمباری سے مزید 43 فلسطینی شہید

غزہ:اسرائیلی فورسزکی جانب سے جارحیت کا سلسلہ جاری ہےاور حالیہ فضائی حملوں میں مزید 43 فلسطینی شہیدہوگئےجن میں خواتین اور بچے بھی شامل ہیں۔
غیر ملکی میڈیا کے مطابق اسرائیلی فورسز کے حملوں میں 24 گھنٹے کے دوران 43 فلسطینی شہید ہوئے جبکہ شہداء کی مجموعی تعداد 52 ہزار 418 ہوگئی،1 لاکھ 18 ہزار 91 فلسطینی زخمی بھی ہوچکے ہیں۔
عرب میڈیا کے مطابق، اسرائیل کی جانب سے مسلسل بمباری کے باعث کئی علاقوں میں تباہی اور انسانی بحران مزید سنگین ہو گیا ہے۔
دوسری جانب اسرائیلی ناکہ بندی کے باعث غزہ کی آبادی خوراک اور پانی کی شدید قلت کا شکار ہے جبکہ بچوں کی زندگیوں کو شدید خطرات لاحق ہو چکے ہیں، ہسپتالوں میں ادویات ختم ہو چکی ہیں اورزخمیوں کا علاج ممکن نہیں رہا۔
ایمنسٹی انٹرنیشنل نے خوراک اورطبی امداد کی ترسیل میں رکاوٹ کو عالمی قوانین کے مطابق “جنگی جرم” قرار دیتے ہوئے فوری انسانی امداد کی فراہمی کا مطالبہ کیا ہے۔
اقوام متحدہ نے بھی غزہ میں بڑھتے ہوئے انسانی المیے پر شدید تشویش کا اظہارکیا ہے۔
آئرلینڈ، آسٹریا اور دیگرممالک کی حکومتوں نے اسرائیلی ناکہ بندی کی مذمت کی ہے جبکہ  ایمنسٹی انٹرنیشنل نے خوراک اور ادویات کی بندش کواسرائیل کا ’’جنگی جرم‘‘ قرار دیاہے۔