پاک بھارت کشیدگی،پی ایس ایل کے بقیہ میچز غیر معینہ مدت تک ملتوی

لاہور: پاک بھارت بڑھتی ہو ئی کشیدگی کے باعث پاکستان سپر لیگ(پی ایس ایل) کے بقیہ میچز غیر معینہ مدت تک ملتوی کر دئیے گئے۔
ترجمانپاکستان کرکٹ بورڈ( پی سی بی) کے مطابق ایل او سی پر صورتحال مزید کشیدہ ہو گئی ہے،بھارت کی جانب سے 78 ڈرونز کی دراندازی اور میزائل حملوں میں اضافہ ہوا ہے۔
ترجمان پی سی بی نےمزید بتایا کہ میچز کی منسوخی کا فیصلہ وزیرِاعظم شہباز شریف کی ہدایت پر کیا گیا ہے۔بھارتی جارحیت کے باعث قومی توجہ اور جذبات افواجِ پاکستان کے ساتھ جڑے ہیں۔
ترجمان کے مطابق پی سی بی اور کھلاڑی شہداء کے لواحقین اور سیکیورٹی فورسز کے ساتھ مکمل یکجہتی کا اظہار کرتے ہیں۔
ترجمان کا کہنا تھا کہ کرکٹ ہماری خوشی کا ذریعہ ہے مگر ملک کی خودمختاری اولین ترجیح ہے،لیکن موجودہ ملکی صورتحال کے پیشِ نظر کرکٹ کو باوقار توقف دینا ضروری ہے۔
انہوں نے مزید کہا کہ غیر ملکی کھلاڑیوں کے ذہنی سکون اور ان کے اہلِ خانہ کے خدشات کا احترام کرتے ہیں،پی سی بی نے تمام شراکت داروں، فرنچائزز، کھلاڑیوں اور اسپانسرز کی کوششوں کو سراہا۔
 پی سی بی کے مطابق پاکستان سپر لیگ 10 کے نئے شیڈول کا اعلان بعد میں کیا جائے گا۔
 خیال رہے کہ گزشتہ روز پی سی بی نے پاکستان سپرلیگ کو پاکستان سے دبئی منتقل کرنے کا اعلان کیا تھا تاہم گزشتہ 24 گھنٹوں کی صورتحال پر لیگ کو ملتوی کرنے کا فیصلہ ہوا۔