بھارت نے دوبارہ جارحیت کی کوشش کی تو مزید طاقت سے جواب دیں گے، وزیر اعظم

وزیرِ اعظم محمد شہباز شریف نے معرکہ حق کے دوران آپریشن بنیان المرصوص کی فرنٹ لائنز کا دورہ کیا ۔ 

وزیرِ اعظم محمد شہباز شریف نے  پسرور چھاؤنی سیالکوٹ کا بھی دورہ کیا ۔ 

وزیرِ اعظم نے معرکہ حق کے دوران آپریشن بنیان المرصوص میں شریک افسروں و جوانوں سے ملاقاتیں کیں ۔ 

وزیراعظم کو معرکے کی تفصیلات اور کور کی موجودہ آپریشنل تیاریوں پر بریفنگ دی گئی۔

وزیراعظم نے پاکستان کی مسلح افواج کی غیر معمولی کارکردگی کو سراہا اور کہا کہ پاکستان کی بہادر افواج نے قوم کے غیر متزلزل عزم سے مضبوط ہو کر مادرِ وطن کا جرات مندانہ دفاع کیا اور دشمن کی بزدلانہ جارحیت کو چند ہی گھنٹوں میں بے مثال مہارت اور عزم سے ناکام بنا دیا، اس فتح کو تاریخ میں سنہری حروف سے لکھا جائے گا۔

وزیراعظم نے کہا کہ پاکستان کو اپنے ان بیٹوں پر فخر ہے، جو قوم کا فخر اور تاج ہیں، معصوم شہریوں، بچوں، خواتین اور بزرگوں پر بمباری کر کے انہیں دہشت گرد قرار دینا انتہائی شرم ناک، غیر اخلاقی اور بین الاقوامی قوانین کی صریح خلاف ورزی ہے، پاکستان نے غیر جانب دار تحقیقات کی پیشکش کی لیکن بھارت نے جان بوجھ کر اس راہ سے گریز کیا کیونکہ ان کے پاس کوئی ثبوت نہ تھا، غرور اور جھوٹی انا کے تحت حملہ کیا گیا جس کا الحمدللہ منہ توڑ جواب دیا گیا۔

واضح رہے کہ وزیرِ اعظم آئندہ چند روز کے دوران پاک فضائیہ اور پاک بحریہ کے افسران و جوانوں سے ملاقات کیلئے ائیر بیسز اور نیول بیسسز کا بھی دورہ کریں گے.  

نائب وزیرِ اعظم و وزیرِ خارجہ محمد اسحاق ڈار، وزیر دفاع  خواجہ آصف،  آرمی چیف جنرل سید عاصم منیر، ایئر چیف مارشل ظہیر احمد بابر سدھو، وفاقی وزراء احسن اقبال، عطاء اللہ تارڑ، آرمی کور کمانڈر سیالکوٹ، اور اعلی سول و عسکری قیادت وزیرِ اعظم کے دورے میں ان کے ہمراہ تھی.