غزہ میں اسرائیلی فوج کی بربریت جاری، مزید 80 فلسطینی شہید

غزہ میں اسرائیلی فوج کی بربریت رکنے کا نام نہیں لے رہی، فضائی حملوں کے نتیجے میں کم از کم 80 فلسطینی شہید ہو گئے ہیں۔

غزہ میں شمالی جبالیہ کے علاقے میں کئی گھروں پر رات گئے بمباری کی گئی، جس میں 22 بچے اور 15 خواتین سمیت 50 فلسطہینی شہید ہوئے۔ اسرائیلی فضائی حملوں کے بعد  جبالیہ کے اسپتال میں مزید 9 افراد کی لاشیں لائی گئیں جن میں سے 7 بچے شامل تھے۔

غیر ملکی میڈیا کے مطابق بدھ کو اسرائیلی فوج کی بمباری میں مجموعی طور پر 80 فلسطینی شہید ہوئے۔ اسرائیلی فوج نے منگل کو جبالیہ اور اردگرد کے علاقوں کے رہائشیوں کو انخلا کی وارننگ دی تھی، جس کے بعد اسرائیل کی جانب سے راکٹ داغے گئے۔

اسرائیلی فوج کا کہنا ہے کہ اس نے شمالی غزہ میں حماس اور فلسطینی جنگجوؤں کو نشانہ بنایا۔  اس سے قبل منگل کو  اسرائیلی فوج کی جانب سے خان یونس کے یورپی اسپتال کے احاطہ میں 9 بنکر بسٹر بم پھینکے گئے، بم پھٹنے سے کئی مقامات پر زمین پھٹ گئی۔ اسرائیلی حملے میں 28 فلسطینی شہید جبکہ 70 افراد زخمی ہوئے۔

یہ صورتحال ایسے وقت میں سامنے آئی ہے جب اقوام متحدہ کے انسانی امداد کے سربراہ نے سلامتی کونسل کے اراکین پر زور دیا ہے کہ وہ غزہ میں نسل کشی کو روکنے کے لیے فوری اقدامات کریں۔

واضح رہے کہ غزہ کی وزارت صحت کے حکام کے مطابق اکتوبر 2023 سے اب تک، غزہ میں اسرائیلی حملوں کے نتیجے میں تقریباً 60 ہزارفلسطینی شہید ہو چکے ہیں۔