مشترکہ فضائی مشقوں کےلیے مختلف ممالک کا پاکستان سے رابطہ

بھارتی جارحیت کے خلاف عظیم الشان فتح کے بعد عالمی سطح پر پاک فضائیہ کےلیے دلچسپی میں اضافہ دیکھنے میں آرہا ہے۔بہت سے ممالک نے مشترکہ فضائی مشقوں کےلیے پاکستان کو دعوت نامے ارسال کیے ہیں۔

ذرائع کے مطابق آپریشن بنیان مرصوص میں بھارت کو دھول چٹانے کے بعد اسلام آباد میں متعدد سفارت خانوں نے پاک فضائیہ کے سینئر حکام سے مستقبل میں دفاعی تعاون کےمواقع تلاش کرنے کےلیے ملاقاتوں کی درخواست کی ہے۔

خیال رہے کہ دور جدید کی اس شاندار فضائی جنگ میں پاک فضائیہ نے 6 بھارتی لڑاکا طیارے مار گرائے جن میں قیمتی اور جدید ترین رافیل طیارے بھی شامل تھے، اس فضائی معرکے میں پاکستان کے 42 کے مقابلے میں بھارت کے 72 طیارے محو پرواز تھے۔

جدید الیکٹرانک وار فیئر اور اسٹریٹیجک درستگی سے حاصل ہونےوالے اس نتیجے کو پاک فضائیہ کی بڑھتی تکنیکی برتری قراردیا جارہا ہے، اس کامیابی میں سب سے اہم چائنیز ساختہ J-10C لڑاکا طیارہ تھا جسے پہلی مرتبہ پاک فضائیہ نےکسی بڑی جنگ میں استعمال کیا۔
اس طیارےکی کارکردگی نے عالمی سطح پر توجہ اپنی طرف مبذول کرائی،فوجی مبصرین نے اس طیارے کےریڈار سسٹم،میزائل کی صلاحیتوں اور پاک فضائیہ کی وسیع تر فضائی حکمت عملی کے منفرد ملاپ کی تعریف کی ہے۔

ذرائع نے انکشاف کیا ہےکہ متعدد سفارت خانوں نے پاک فضائیہ سے رابطہ کیاہے،دفاعی اتاشیوں نے یہ جاننےمیں دلچسپی ظاہر کی ہےکہ مشن کو کیسے انجام دیاگیا اور اسٹریٹیجک تعاون کےلیے کیا مواقع موجود ہیں۔

جہاں J-10C کی کارکردگی کی وجہ سے چین کی ہوا بازی کی صنعت توجہ کا مرکز بنی ہوئی ہے،وہیں چائنیز حکام اس بات سے بھی متوجہ ہیں کہ پاکستان نےکیسے بھارتی فضائیہ کو فیصلہ کن دھچکا پہنچانے کےلیے مقامی ٹیکنالوجیز اور حکمت عملیوں کو یکجا کیا۔

متحدہ عرب امارات اور سعودی عرب جیسے ممالک پہلےہی پاکستان کو آئندہ بین الاقوامی فضائی مشقوں میں شرکت کی دعوت دےچکے ہیں۔

توقع ہےکہ اس مشترکہ کامیابی سے دوطرفہ دفاعی تعلقات خصوصاً JF-17 تھنڈر جیسے منصوبوں کےتحت مزید گہرےہوں گے،جے ایف 17 تھنڈر طیارے کا 58 فیصد ائیر فریم پاکستان میں تیار ہوتا ہےجب کہ حتمی اسمبلی بھی مقامی سطح پر ہوتی ہے۔