بلوچستان،سکیورٹی فورسزکی کارروائی،3 دہشتگرد ہلاک

بلوچستان کے 2 مختلف اضلاع میں سکیورٹی فورسز کی کامیاب کارروائی،3 بھارتی اسپانسرڈ دہشتگرد ہلاک،2زخمی ہو گئے۔

آئی ایس پی آر نے بتایا کہ 17 تا 18 مئی 2025 کو بلوچستان میں دو الگ آپریشن میں بھارتی اسپانسرڈ نام نہاد بلوچ لبریشن فرنٹ سے تعلق رکھنے والے تین دہشت گرد مارے گئے۔سیکیورٹی فورسز نے بھارتی اسپانسرڈ دہشت گردوں کی موجودگی کی اطلاع پر ضلع آواران کے علاقے گشکور میں آپریشن کیا۔

ترجمان پاک فوج کے مطابق آپریشن کے دوران سیکیورٹی فورسز نے دہشتگردوں کے ٹھکانے کو مؤثر نشانہ بنایا، جبکہ شدید فائرنگ کے تبادلے میں بھارتی اسپانسرڈ دہشت گرد یونس مارا گیا، جبکہ دو بھارتی اسپانسرڈ دہشت گرد زخمی ہو گئے۔سیکیورٹی فورسز نے دوسرا آپریشن ضلع کیچ میں کیا، جہاں فورسز نے کامیابی کے ساتھ 2 بھارتی اسپانسرڈ دہشت گردوں (دہشتگرد سرغنہ صابر اللہ اور امجد بیچو) کو ہلاک کر دیا۔
آئی ایس پی آر کے مطابق مارے گئے بھارتی اسپانسرڈ دہشت گردوں سے اسلحہ، گولہ بارود اور دھماکا خیز مواد بھی برآمد کیا گیا، مزید کہنا تھا کہ دہشتگرد قانون نافذ کرنے والے اداروں کے خلاف دہشت گردی کی متعدد سرگرمیوں کے ساتھ ساتھ معصوم شہریوں کی ٹارگٹ کلنگ میں بھی ملوث تھے۔

ترجمان پاک فوج کے مطابق علاقے میں موجود کسی بھی دہشت گرد کو ختم کرنے کے لیے سینیٹائزیشن آپریشنز کیے جا رہے ہیں، مزید کہنا تھا کہ پاکستان کی سیکیورٹی فورسز قوم کے ساتھ مل کر بلوچستان کے امن، استحکام اور ترقی کو سبوتاژ کرنے کی بھارتی پراکسیوں کی کوششوں کو ناکام بنانے کیلئےپرعزم ہیں۔

 
 وزیراعظم شہباز شریف نے بلوچستان میں دہشتگردوں کو ہلاک اورزخمی کرنے پر فورسز کو خراج تحسین پیش کیا۔
شہباز شریف کا کہنا تھا کہ شہریوں کی جان و مال خطرے میں ڈالنے کی بھارتی سازش بے نقاب ہو چکی ہے، بھارت کے پاکستان میں امن کو نقصان پہنچانے کے مذموم عزائم خاک میں ملا دیں گے۔
۔