اسلام آباد میں غیر قانونی تعمیرات اور سوسائٹیز کے خلاف فوری آپریشن کا فیصلہ

اسلام آباد میں غیر قانونی تعمیرات اور سوسائٹیز کے خلاف فوری آپریشن کرنے کا فیصلہ کرلیا گیا، وفاقی وزیر داخلہ محسن نقوی نے غیر منظور شدہ ہاؤسنگ سوسائٹیز اور گھروں کیخلاف کارروائی کا حکم دے دیا۔

اسلام آباد میں وفاقی وزیر داخلہ محسن نقوی کی زیر صدارت اجلاس ہوا، جس میں اسلام آباد میں غیر قانونی تعمیرات، غیر منظور شدہ ہاؤسنگ سوسائٹیز اور گھروں کیخلاف کارروائی کا حکم دے دیا گیا۔

وزیر داخلہ محسن نقوی نے کہا کہ متعلقہ افسران صفر برداشت کی پالیسی پر عمل درآمد یقینی بنائیں، شہریوں کی سہولت کے لیے متعلقہ افسران نئے اقدامات تجاویز کریں۔ اسلام آباد میں اشیائے ضروریہ کی قیمتوں پر مؤثر کنٹرول یقینی بنانے اور عیدالاضحیٰ کے موقع پر صفائی کا خاص خیال رکھنے کی بھی ہدایت کی۔

وزیر مملکت برائے داخلہ طلال چوہدری اور دیگر اعلیٰ خکام بھی اجلاس میں شریک ہوئے۔

واضح رہے کہ وفاقی دارالحکومت کی حدود میں متعدد سوسائٹیز بغیر اجازت ناموں (این او سی) کے تعمیر کی جاچکی ہیں، جو ماسٹر پلان کے مطابق تعمیر کیے گئے شہر کے انفرااسٹرکچر پر بوجھ بن رہی ہیں، یہ غیر قانونی سوسائٹیاں برسات اور قدرتی آفات کے دوران بڑے مسائل کی زد میں آسکتی ہیں۔