عدالت کا ٹک ٹاک پر غیر اخلاقی مواد روکنے کیلئے اقدامات کرنے کا حکم

تفصیلات کے مطابق  پشاور ہائیکورٹ میں   ٹک ٹاک پر غیر اخلاقی مواد کی روک تھام کے لئے دائر درخواست پر سماعت ہوئی ،  ڈی جی پی ٹی اے،ڈی جی ایف آئی اے اور ڈی جی پیمرا عدالت میں پیش ہوئے۔ عدالت نے ڈی جی پیمرا، ڈی جی پی ٹی اے، ڈی جی ایف آئی اے کو مل بیٹھ کر ٹک ٹاک پر غیر اخلاقی مواد روکنے کے لئے اقدامات کرنے کا حکم دے دیا،عدالت نے آئندہ سماعت پر تفصیلی رپورٹ طلب کرلی ۔

چیف جسٹس قیصر رشید نے استفسار کیا کہ  آپ لوگوں کو پتہ ہے آپ کو عدالت کیو ں بلایا ہے،جس پر ڈی جی پی ٹی اے نے جواب دیا کہ  جی ہمیں پتہ ہے ٹک ٹاک کے حوالے سے کیس میں بلایا ہے۔چیف جسٹس قیصر رشید نے کہا کہ   ٹک ٹاک پر غیر اخلاقی ویڈیوز لوگ اپلوڈ کرتے ہیں اس کی روک تھام کے لئے آپ لوگ کیا کررہے ہیں، یہ اسلامک رپبلک آف پاکستان ہے یہ یہاں کیا ہورہا ہے، کس کلچر کو یہاں پر فروغ دے رہے ہیں۔ چیف جسٹس نے کہا کہ    غیر اخلاقی مواد اپلوڈ کرنے سے نوجوان متاثر ہورہے ہیں، جو ویڈیوز آتے ہیں اس سے طلباءو طالبات بھی بے نقاب ہورہے ہیں، نوجوان نسل کو برائیوں سے بچانا ہمارا قومی فریضہ ہے۔

چیف جسٹس قیصر رشید خان نے کہا کہ  غیر اخلاقی مواد کی روک تھام کے لئے آپ کیا کررہے ہیں، ٹک ٹاک پر جو چیز اپلوڈ ہوتی ہے اس کو فلٹر کرنے کے لئے اقدامات کئے جائیں، آپ سب مل بیٹھ کر اس کا کوئی حل نکالیں،آئندہ سماعت پر تفصیلی رپورٹ جمع کریں لیکن صرف کاغذی کارروائی نہیں گراونڈ پر ایکشن بھی ہونا چاہئیے۔ڈی جی پی ٹی اے نے کہا کہ  ہم اس کے لئے اقدامات کررہے ہیں، جو لوگ بار بار خلاف ورزی کرتے ہیں ان کے اکاونٹ بلاک کردیتے ہیں۔